Тохсунньу 5 күнүгэр П.А.Петров аатынан улуустааҕы киин балыыһа Оҕо төрөтөр дьиэтигэр 2022 сылга аан бастакынан төрөөбүт 3 кырачаан уол оҕо күн күбэй ийэлэригэр «Cүүс сыл оҕолоро» тус сыаллаах хапытаал сэртипикээтин үөрүүлээх быһыыга-майгыга туттардылар.
edersaas.ru
Күн күбэй ийэлэри: Зоянна Иванованы, Сахаяна Кириллинэни, Сардана Васильеваны улуус баһылыгын социальнай бэлиитикэҕэ солбуйааччы эбээһинэһин толорооччу Клара Валерьяновна Гаврильева эҕэрдэлээтэ уонна «Сүүс сыл оҕолоро» хапытаал сэртипикээттэрин туттарда.
Улуус балыыһатын кылаабынай бырааһа Егор Анатольевич Григорьев, СӨ Үлэҕэ уонна социальнай сайдыыга министиэристибэтин Бүлүү территориятааҕы уорганын салайааччыта Алина Афанасьевна Каратаева, Бүлүү к. баһылыгын солбуйааччы Татьяна Егоровна Кондакова, Бастакы Тоҕус нэһилиэгин баһылыга Акимар Акимович Михайлов эҕэрдэлээтилэр.
Онтон эдэр ийэ Сардана Васильева СӨ Ил Дархана Айсен Николаев «Сүүс сыл оҕолоро» тус сыаллаах хапытаалы олохтообутугар уонна балыыһа бары үрүҥ халааттаах аанньалларыгар улахан кыһамньыларын, үтүө сыһыаннарын иһин махтал тылларын эттэ.
Надежда ЕГОРОВА, «Саха сирэ», edersaas.ru