Бүлүүгэ ойуур хаһаайыстыбатын үлэһиттэрэ бааһынай кэбиһиилээх отун «өртөөтүлэр»

Бөлөххө киир:

 “Якутлесресурс” судаарыстыбаннай-автономнай тэрилтэ кэлиҥҥи кэмҥэ күһүн аайы хонтуруолланар өртөөһүнү ыытар буолла. Бүлүү улууһунааҕы филиал үлэһиттэрэ иллэрээ күн, балаҕан ыйын 25 күнүгэр, Лөкөчөөн нэһилиэгэр итинник өртөөһүнү ыыппыттарыгар Афанасий Харлампьев Бүгүйэххэ баар ходуһатын хадьымалыгар сытар рулоннара уокка былдьаннылар.

Бааһынай хаһаайыстыба баһылыга, бука, отун быыһыыр түбүгэр сылдьар быһыылаах: сибээс кыайан хаппат. Онон нэһилиэк баһылыга Анна Дорҕооноболуун кылгас кэпсэтиигэ “лесресурсалар” биллэрбэккэ-сэрэппэккэ өртөөбүттэрин, бааһынай 3-түү центнердээх 50-ча рулона күл-көмөр буолбутун иһитиннэрдэ.

Бу Бүгүйэх диэн сир Лөкөчөөнтөн Бүлүү куорат диэки барыыга 2 көстөн тэйиччи, айан суолун ойоҕоһуттан чугас сытар. “Якутлесресурс” САТ үлэһиттэрэ Бүгүйэх аттынааҕы толоон саҕатын өртөөбүттэрэ Бүгүйэххэ өтөн киирбит. Афанасий Кузьмич хадьымалыгар уот айбардаан эрэрин бэҕэһээ эрэ билбит. Онон, киһи хайдах даҕаны “хонтуруолланар өртөөһүн” диэн сөбө суох быһыыта-майгыта таҕыста.

Василий НИКИФОРОВ, edersaas.ru

+1
0
+1
0
+1
0
+1
0
+1
0
+1
0
+1
0