Соторутааҕыта Бүлүүгэ уонна Үөһээ Бүлүүгэ «АЛРОСА» хампаанньа үлэ дьаарбаҥкатын тэрийэн ыытта. Манна 320 үлэ миэстэтин билиһиннэрдилэр. Үөһээ Бүлүүгэ 163, Бүлүүгэ 139 киһи үлэ көрдөөн, дьаарбаҥкаҕа кэлэ сырытта. Кинилэр үлэ усулуобуйатын, туох ирдэнэрин билсэн бардылар.
Тыа сиригэр үлэтэ суох олорор дьоҥҥо бу дьаарбаҥка хас да хайысханан ыытылынна. Хампаанньа араас салааларыттан үлэһиттэр кэлэн, хас биирдии киһиэхэ сөптөөх үлэ буларга сүбэ-ама биэрдилэр, нэһилиэктэринэн ханна, туох үлэ баарын билиһиннэрдилэр, кууруска үөрэнии быыстапкатын тэрийдилэр.
2018 сыл тохсунньу 30 күнүгэр СӨ Нэһилиэнньэтин дьарыктаах буолуутун судаарыстыбаннай кэмитиэтэ уонна «АЛРОСА» хампаанньа «Олохтоох дьону – бырамыысыланнаска» диэн бырайыагы 2018-2022 сылларга олоххо киллэрэргэ сөбүлэһии түһэрсибиттэрэ. Бу сөбүлэһии чэрчитинэн чуолаан тыа сиригэр үлэтэ суох дьону сир баайын хостуур хамнастаах үлэҕэ сыһыарарга араас тэрээһин ыытыллар.
2018 сыллаахха 950 төрүт олохтоох дьон алмаастаах хампаанньаҕа үлэҕэ киирбиттэрэ, ол иһигэр баахта ньыматынан 418 киһи, тыа сириттэн 332 киһи, 30 саастарыгар диэри 259 эдэр ыччат.
Хампаанньа үлэһиттэри бэлэмниир киинигэр уонна Мииринэйдээҕи тиэхиньиичэскэй кэллиэскэ 110 киһи үөрэнэн, эбии идэ ылбыттара. «Олохтоох дьону – бырамыысыланнаска» бырайыак чэрчитинэн дьону эбии үөрэттэрэргэ 3 мөлүйүөн солкуобай ороскуоттаммыт.
Тыа сириттэн кэлбит дьон үлэ саҥа усулуобуйатыгар түргэнник үөрэнэллэрин, кэлэктиипкэ киирэллэрин туһугар 2018 сылтан кинилэргэ настаабынньыктары сыһыаран үлэлэтэллэр.
2019 сыл кулун тутарыгар диэри өссө 285 киһи «АЛРОСА»-ҕа үлэҕэ киирдэ, онтон сүүһэ — тыа сирин олохтоохторо. Балартан 38 киһи атын идэҕэ үөрэннэ.
Бу сыыппараны ааҕарга барыта үчүгэй курдук эрээри, «Олохтоох дьону – бырамыысыланнаска» диэн бырайыак иһинэн уопсайа 5726 киһи үлэнэн хааччыллыбытыттан, биир сыл буолан баран 2755 эрэ хаалбыт. Аҥаардара биир да сыл үлэлээбэккэ уурайан барбыт. Онон, тыһыынчанан дьон үлэҕэ киирдилэр, сахалар бырамыысыланнаһы баһылаан эрэллэр диэн үөрэр эрдэ соҕус, саамай сүрүнэ дьоммут онно тутуһан үлэлиэхтэрин, бэйэлэрин көрдөрүөхтэрин наада.
Марианна Тыртыкова, «Саха сирэ» хаһыат, edersaas.ru