Доруобуйа

Бүлүүгэ коронавируһу утары быһыыны биэрии тэтимирэр

Коронавируһу утары быһыыны биэрии Бүлүүгэ тэтимирэн эрэр.

«Ордук бу кэнники ыйдарга нэһилиэнньэ коронавируһу утары быһыыны ылара эбилиннэ», — диэн амбулаторнай-поликлиническай көмөҕө кылаабынай бырааһы солбуйааччы Алёна Афанасьева этэр.
Быһыыны ылбыттар ахсааннара эбиллэн иһэр. Быһыы бастакы компоненын ылбыттар ахсааннара 6598 киһи буолла, икки компонены ылбыттар – 5857 киһи. Кэнники үс нэдиэлэҕэ оройуоммутугар 1000 дуоза «ЭпиВакКорона» уонна 300 дуоза  «ГамКовидВак» вакцина аҕалылыннылар, сотору кэминэн «Спутник-лайт» кэлиэхтээх.
Вакциналар тута поликлиникаларга быһыыны биэрэр хосторго бэриллэллэр уонна наадыйыыларынан көрөн  нэһилиэктэргэ амбулаторияларга ыытыллаллар. «ГамКовидВак» вакцинаны 4484 киһи (бастакы дуозатын), 4069 киһи (икки дуозаны), «ЭпиВакКоронаны» — 2114 киһи (1 дуозаны), 1785 (икки дуозаны) ылбыттар.
Тэрилтэ сайаапкатынан (25 киһиттэн элбэх буоллаҕына) быһыыны биэрэр биригээдэлэр миэстэтигэр тиийэллэр. Бары нэһилиэктэр вакцинациянан хааччыллыбыттар, сорох нэһилиэктэргэ поликлиникаттан  быһыыны биэрэр биригээдэлэр тиийэллэр. Нэһилиэктэргэ мэдиссиинэ бары үлэһиттэрэ үөрэнэн, быһыыны миэстэтигэр оҥоро олороллор.
Оройуоҥҥа эпидемиологическай быһыы-майгы уларыйа турар. Уоппуска уонна сынньалаҥ кэмигэр улуус иһигэр уонна улуус таһыгар кэлии-барыы элбээтэ. Нэһилиэнньэ ортотугар мааската суох сылдьыы, бэйэни хааччахтанан олоруу эрэсиимин тутуһуу биллэ намтаата. Бу барыта коронавирус тарҕаныытыгар төрүөт буолар.
Нэһилиэнньэ булгуччу мааскаланарыгар, бэйэ икки ардыгар тэйиччи буолууну тутуһалларыгар, ордук атын сиргэ сынньанан кэлбит дьон бэйэни хааччахтанан олоруу эрэсиимин тутуһалларыгар этэбит.
0
0