Бүлүү куоратыгар Марк Жирков аатынан култуура дыбарыаһыгар «Вилюйчане-выдающиеся государственные деятели» диэн историческай саала баар буолла.
Бу историческай саала Бүлүүттэн төрүттээх үс бөдөҥ бэлитиичэскэй-судаарыстыбаннай диэйэтэллэргэ ананна. Ол курдук, Степан Максимович Аржаков, Степан Филиппович Гоголев, Гавриил Иосифович Чиряев тустарынан кэпсиир матырыйааллар мультимедийнай панелларынан көрдөрүлүннэ. Маны таһынан, бу саалаҕа улууспут кэрдиис кэмнэргэ хайдах сайдыбытын, кимнээх улууһу салайбыттарын көрдөрөр истиэндэлэр бааллар. Тэрээһин саҕаланыытыгар улууспутугар ааспыт 2021 сылга туох үлэ барбыта кылгас кэмнээх киинэ буолан көстүбүтэ мустубут дьоҥҥо сэҥээриини ылла. Бу историческай саала кэлин кэҥээн судаарыстыбаннас мусуойа буолуон сөп эбит диэн кыттыыны ылбыт дьон санааларын этиннилэр. Ол курдук, Бүлүү дьоно баай-киэҥ историялааҕын ааһан, быйыл Саха АССР 100 сылын бэлиэтиирбитигэр Платон Ойуунускайы, Максим Аммосовы кытары кинилэр соратниктара Степан Аржаков, Степан Гоголев ааттара доргуччу ааттанарыгар бу саҥа саала аһыллыбыта улахан көмөлөөх буолуоҕа. Бүлүүбүт чахчы чаҕылхай, чулуу дьоннорунан баай, киэҥ историялаах. Ол курдук, кинилэр истэригэр үс Сэбиэскэй Сойуус дьоруойдара, алта Үлэ Дьоруойдара, бастакы профессиональнай композитор, аан дойду үрдүнэн синтетическэй каучугу арыйбыт учуонай бааллар.
Историческай саала аһыллыытыгар ыаллыы Үөһээ Бүлүү улууһуттан улахан дэлэгээссийэ кэлэн кыттыыны ылла. Салгыы Бүлүү улууһугар быйылгы сыл туох сылынан буоларын үөрүүлээхтик биллэрии буолла. 2022 сыл Арассыыйаҕа Искусство уонна култуурунай нэһилиэстибэ, оттон Саха сиригэр Ийэ сылынан биллэриллибит буоллаҕына, Бүлүү улууһугар Бүлүү чулуу дьонун сылынан биллэрилиннэ. Тэрээһин наҕараадалары туттарыынан уонна музыкальнай эҕэрдэнэн түмүктэннэ.Тэрээһиҥҥэ Дьөккөнтөн кыттыбыт киһи быһыытынан көрдөхпүнэ, улуус салалтата чулуу дьоммут ааттарын үйэтитиигэ дьоһун хардыыны оҥорбутун бэлиэтиибин уонна махталбын тиэрдэбин!
Бүлүү Дьөккөнүттэн Альбина Ионова
Хаартыска ааптар тиксэриилэрэ