Быйыл күһүн Бүлүүгэ балыыһа саҥа комплексын бастакы уочарата тутуллан киириэҕэ. Манна хирургическай сулууспалар киириэхтэрэ. Саҥа балыыһа аныгы ирдэбиллэргэ эппиэттиир, ону тэҥэ, улууска оҥоһуллар хирургическэй эпэрээссийэлэри саҥа таһымҥа тахсалларыгар олук ууруоҕа.
Тутуу 2016 сыллаахха саҕаламмыта эрээри, үбүлээһин тиийбэккэ, тохтоон турбута. Онтон Айсен Николаев быһаарыытынан, “Доруобуйа харыстабыла” национальнай бырайыак «Модернизация первичного звена здравоохранения РС(Я) на 2021-2025 годы» бырагырааматыгар киирбитин кэннэ, 2021 сылтан тутуу тэтимнээхтик ыытылынна. Дьиэ көҥдөйө, тас оҥоһуута бүтэн турар. Билигин ититии, элэктириичэстибэ ситимнэригэр холбуу сылдьаллар, ис үлэтин оҥороллор. Мэдиссиинэ саҥа, аныгы тэриллэрин ыларга үлэ барар.
Балыыһа билиҥҥитэ эргэ мас дьиэҕэ үлэлии турар, ол киэҥ-куоҥ, аныгы тиэхиникэнэн хааччыллыбыт, таас дьиэҕэ хайдах тэҥнэһиэй? Аҥаардас хирургия отделениета 1200 кв.м. иэннээх буолуоҕа. Оттон 1600 кв.м. иэннээх уопсай блокка дьону көрөр отделение, рентген-кабинет, изолятор балаатата, лаборатория, аһыыр, астыыр блок, таҥас сууйар сир, о.д.а. хаһаайыстыбаннай чаас баар буолуохтара.
— Саҥа балыыһа бырайыага ымпыгар-чымпыгар тиийэ барыта үчүгэйдик толкуйдаммыт, онон миэдиктэр үлэлииллэригэр уонна пациеннар сыталларыгар олус табыгастаах. Хирургическай эпэрээссийэлэрбит араастара кэҥиэҕэ. Биһиги улууспутугар аан бастаан эндопротезирование эпэрээссийэтин оҥорор былааннаахпыт. Маннык эпэрээссийэ өрөспүүбүлүкэҕэ Дьокуускайга эрэ оҥоһуллар. Биһиги быраастарбыт Москва, Санкт-Петербург килиининкэлэригэр баран үөрэниэхтэрэ, бэлэмнэниини ааһыахтара. Лапароскопическай эпэрээссийэлэри эмиэ элбэтиэхпит. Онон былааммыт элбэх. Саҥа балыыһа Бүлүүтээҕи оройуоннай киин балыыһа материальнай-техническэй базатын саҥардыы соруктарын быһаарыаҕа, хирургическай көмө таһымын үрдэтиэҕэ, — диэн киин балыыһа кылаабынай бырааһа Егор Григорьев кэпсээтэ.
Бу кэнниттэн комплекс 2-с блога тутуллуохтаах. Билигин судаарыстыбаннай эспэртиисэни бара сылдьар. Терапия, тымыр, инфекционнай, реабилитация отделениелара, төрүүр дьиэ, о.д.а. киириэхтээхтэр диэн доруобуйа харыстабылын министиэристибэтин пресс-сулууспаат иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.