Бүлүүгэ, Хомустаах биэрэгэр, Саха сирин маһа, талаҕа, эҥинэ бэйэлээх дьэрэкээн үүнээйитэ олордуллубут айылҕа абылаҥар угуйар олус кэрэ паарка арыллыа.
Маннык кэрэ паарканы тэрийэр ыра санаалаах, Бүлүүтээҕи ойуур хаһаайыстыбатын дириэктэринэн бэриниилээхтик үлэлээбит Дмитрий Макаров аата бу саҥа пааркаҕа иҥэриллэр. Ытык киһилэрин ыра санаатын «Бүлүү күөх кура» экологическай пуонда көхтөөх кыттааччылара олоххо киллэрдилэр.
Дендропааркаҕа Саха сиригэр үүнэр мас, талах арааһын, ону сэргэ, Кыһыл кинигэҕэ киллэриллибит үүнээйилэри көрүөххэ сөп. Улахан паарканы арыйар туһуттан, сайыннары, күһүннэри күргүөмнээх үлэ тиһиктээхтик салҕаммыт. Кэрэ сиргэ киирэр аарка Кирилл Поскачин бырайыагынан оҥоһуллубут. Аарка киэргэлин уонна тимир сэргэлэри «Саха-сталь» тэрилтэ чочуйбут. Үлэни маастар Айтал Матвеев салайааччылаах биригээдэ толорбут, Дьокуускайтан Федот Поскачин аҕалбыт.
Дмитрий Гаврильевич Макаров ыра санаатын бииргэ төрөөбүттэрэ, «Бүлүү күөх кура» пуонданы саҕаласпыт Прасковья уонна Ксения Гаврильевналар олоххо киллэрэргэ төһүү буоллулар. 2018 сыллаахха пуонда салайааччылара Ил Дарханы кытары көрсүһүүлэригэр, Айсен Николаев уопсастыбаннай экологтар үлэлэрин өйүүрүн биллэрбитэ. Ол сыл Бүлүү куорат дьаһалтата учаастак биэрбитэ. Тэрийэр уонна тэхиньиичэскэй үлэ саҕаламмыта. Оттон бырайыагы олоххо киллэрэргэ СӨ Ил Дарханын грана, куорат дьаһалтатын уонна пуонда көхтөөх кыттааччыларын үптэрэ туһанылыннылар. Ити барытын түмүгэр, бу ыйга пуонда көхтөөх кыттааччылара уонна өйөөччүлэрэ «Экологическай ыллык» дендропаарканы арыйар баҕалаахтар. Бу туһунан ulus.media иһитиннэрэр.
Манна эбэн эттэххэ, «Бүлүү күөх кура» экологическай пуонда нэһилиэнньэни айылҕа харыстабылыгар угуйар сыаллаах 2013 сыллаахха тэриллибитэ. Сэмэй ситиһиилэриттэн кылгастык сырдаттахха, 2014 сыллаахха пуонда көҕүлээһининэн тэриллибит “Бүлүү Эбэ күнэ” 2017 сыллаахтан бэттэх Бүлүү бөлөх улуустары барыларын хабан үлэлиир. Бүлүүгэ, Уолбут диэн сиргэ, биллиилээх модель, меценат Наталья Водянова пуондатыттан оҕо былаһаакката оҥоһуллубута. «Ыра санаам — ыраас Бүлүүм» диэн «Үүнэр көлүөнэ пуондатын» өйөбүлүн ылбыт бырайыак чэрчитинэн искибиэрдэргэ, былаһааккаларга мас олордуута, Кыадаҥнаҕа Р.К. Маак таарыйан ааспытын туоһулуур мэҥэ бэлиэни туруоруу, килбиэннээх үлэтинэн төрөөбүт Сахатын сирин суон сурахтаахбыт, аатырдыбыт норуодунай учуутал Михаил Андреев олорбут дьиэтигэр өйдөбүнньүк дуоска ыйаныыта барыта бу уопсастыбыннай тэриллии сырата, кыһамньыта.
Маны сэргэ, «Бүлүүбэр тапталым бэлиэтэ — айылҕа кэрэтин бэлэҕэ» бырайыагынан, улуустарын нэһилиэктэригэр сибэккилиир мастары олордоллор. Пуонда бэлэхтээбит сэдэх мастара Үгүлээт, Кыадаҥда, Өкүндү, Тааһаҕар нэһилиэктэрин искибиэрдэрин, Бүлүү 3 №-дээх, Мастаах оскуолаларын киэргэтэллэр.
+1
+1
+1
+1
+1
+1
+1