Бүлүүгэ 1 №-дээх оскуола хапытаалынай өрөмүөнүн бастакы түһүмэҕэ түмүктэннэ

Ааптар: 
Бөлөххө киир:
Бүгүн, атырдьах ыйын 31 күнүгэр, Билии күнүн иннинэ Ил Дархан Айсен Николаев  Бүлүү куоракка Гавриил Чиряев аатынан  оскуола өрөмүөнэ хайдах-туох ыытыллыбытын билистэ уонна педагогическай кэлэктииби кытта көрүстэ. 
Өрөмүөн «Үөрэхтээһин систиэмэтин  саҥардыы» диэн федеральнай бырагыраама чэрчитинэн ыытыллар, кыһа 2005 сыллааҕы тутуу. «Хапытаалынай өрөмүөн иитинэн икки оскуола өрөмүөннэннэ. Гавриил Чиряев аатынан оскуола улууска эрэ буолбакка, өрөспүүбүлүкэ үрдүнэн биллэр-көстөр кыһанан буолар. Өрөмүөн икки түһүмэҕинэн ыытыллар. Олохтоох хампаанньа өрөмүөнү хаачыстыбалаахтык ыыппыт. Ону тэҥэ, саҥа оборудованиелар атыылаһыллан туруоруллубуттар.  Бу — оҕолор бары өттүнэн сөптөөх билиини ылалларыгар улахан көдьүүстээх буолуоҕа», — диэн Айсен Сергеевич эттэ.
Өрөмүөн бастакы түһүмэҕэ быйыл сааскыттан саҕаламмыта. Ол курдук, сайын устата түннүктэрин уларыппыттар, кырыыһатын, ититэр систиэмэтин саҥанан солбуйбуттар, уо.да.а үлэлэр ыытыллыбыттар. Ону тэҥэ, биологическай-мэдиссиинискэй, физика уонна сыыппара кылаастарыгар саҥа оборудованиелары таҥар туруорбуттар. Саҥа оборудованиелары оҕолор бэйэлэрэ Айсен Николаевка көрдөрдүлэр. Учууталлар үөрэнээччилэрин өрөспүүбүлүкэтээҕи уонна Арассыыйатааҕы тэрээһиннэргэ ситиһиилэрин киэн тутта билиһиннэрдилэр, кэпсээтилэр. Кэккэ кылаастар саҥа тэриллэринэн хааччыллыылара оҕолор ситиһиилэрин, кыайыыларын хаҥатыыга көмөлөөх буоларыгар эрэнэллэрин биллэрдилэр.
  Оскуола өрөмүөнүн бастакы түһүмэҕэр  федеральнай бүддьүөттэн 85 мөл. солк көрүллүбүтүттэн 10,4 мөл. солк. саҥа оборудованиелары атыылаһыыга туһаныллыбыт. Кэлэр сылга өрөмүөн иккис түһүмэҕэ саҕаланыаҕа. Санатар буоллахха,  федеральнай хапытаалынай өрөмүөн бырагырааматынан  Дьокуускай куорат 58 оскуолатыгар уонна 25 оройуон кыһаларыгар тустаах үлэ ыытыллыбыт.
+1
0
+1
0
+1
0
+1
0
+1
0
+1
0
+1
0