Бүгүн, балаҕан ыйын 26 күнүгэр Горнай уонна Дьокуускай кыраныыссатыгар Саха Өрөспүүбүлүкэтин Ил Дарханын э.т. Айсен Николаев кыттыылаах «Бүлүү» А-331 суолун кэрчигин уонна саҥа кыраныысса өрөгөйдөөх арыллыыта буолла.
Федеральнай суолу тутааччылар 30 км усталаах суолу саҥардан үлэҕэ киллэрдилэр. Кинилэр 2014 сылтан ыыппыт үлэлэрин түмүгүн массыынанан көбүс-көнө биир да охсуута суох суолунан айаннаан иһэн билэҕин. «Бүлүү» федеральнай трасса Дьокуускайы кытта сэттэ улууһу ситимниир. Айанньыттар куттала суох, сымнаҕастык айанныылларыгар анаан, суолу 3,5 м диэри кэтирэтэн биэрбиттэр. Хас биирдии суол салайыыларыгар массыыналар куттала суох ааһар кыахтаммыттар. Маны таһынан, суол 61-ис км Дьокуускай уонна Горнай улууһун кыраныыссатын бэлиэтиир саҥа тутуу уонна массыыналар тохтоон сынньанар сирдэрэ оҥоһуллубут.
Суолу Чувашия «Дорисс» АУо уонна «Сельдорстрой» ХЭУо оҥордулар. Аны «Бүлүү» федеральнай суолугар 140 км, 5 муостаны, 44 уу ситимин оҥороллоро былааннанар.
Айсен Николаев, СӨ Ил Дарханын э.т.:
— «Бүлүү» федеральнай суолун оҥоруу биир сүрүн сорукпут буолар. Дьокуускайтан асфальтаммыт суол Горнай улууһугар кэлэн, эһиил Бэрдьигэстээххэ тиийиэҕэ. «Бүлүү» суола Иркутскай уобаласка тиийэ оҥоһуллан, Өлүөнэ нөҥүө муоста тутулуннаҕына, Магаданы кытта быһа сибээһи холбуур соруктаах.
ВИДЕО:
Николай Попов, «Саха сирэ» хаһыат, edersaas.ru