Бүлүү, Үөһээ Бүлүү, Ньурба улууһун олохтоохторо 4G суотабай сибээскэ уонна оптика түргэн тэтимнээх аан дойду ситимигэр холбоннулар.
edersaas.ru
Интэриниэккэ холбонуу үөрүүлээх уонна долгутуулаах чааһын тохсунньу 18 күнүгэр Ил Дархан Айсен Николаев, «Ростелеком» хампаанньа Саха сиринээҕи салаатын дириэктэрэ Константин Войтеховскай уонна МТС хампаанньа Саха сиринээҕи салаатын тиэхиньиичэскэй дириэктэрэ Роман Фелиферов арыйдылар. Кинилэр видеокэмпириэнсийэ быһыытынан, улуус баһылыктарын, олохтоохторун кытта быһа сибээскэ таҕыстылар, эҕэрдэлэрин тиэртилэр.
Бүлүү, Үөһээ Бүлүү, Ньурба улууһун олохтоохторо 4G суотабай сибээскэ уонна оптика түргэн тэтимнээх аан дойду ситимигэр холбоннулар. Интэриниэккэ холбонуу үөрүүлээх уонна долгутуулаах чааһын тохсунньу 18 күнүгэр Ил Дархан Айсен Николаев, «Ростелеком» хампаанньа Саха сиринээҕи салаатын дириэктэрэ Константин Войтеховскай уонна МТС хампаанньа Саха сиринээҕи салаатын тиэхиньиичэскэй дириэктэрэ Роман Фелиферов арыйдылар. Кинилэр видео-кэмпириэнсийэ быһыытынан, улуус баһылыктарын, олохтоохторун кытта быһа сибээскэ таҕыстылар, эҕэрдэлэрин тиэртилэр.
«Бүлүү экспреһэ» диэн бырайыагы, баара-суоҕа аҕыс эрэ ый иһигэр 650 килэмиэтир усталаах оптика ситимин тардан, олоххо киллэрдилэр. Бүлүү, Үөһээ Бүлүү, Ньурба улууһун 22 нэһилиэгэ аан дойду ситимигэр холбонон, 53 тыһыынча киһилээх нэһилиэнньэ аныгы олох сайдыытын араас көрүҥнэрин үөрэхтэригэр, үлэлэригэр, күннээҕи олохторугар туһанар кыахтаннылар.
Ил Дархан Айсен Николаев: «Күн бүгүн өрөспүүбүлүкэ нэһилиэнньэтин 79 бырыһыана түргэн интэриниэтинэн хааччылынна. Онон Бүлүү бөлөх улуустара аныгы IT-бырайыакка кыттыһар, телемэдиссиинэ өҥөтүнэн туһанар, урбааны сайыннарар кыахтаннылар», — диэн эттэ.
Ону таһынан, бу улуустарга 4G сибээс киирдэ, 2019 сыл бүтүөр диэри суотабай сибээс маннык өҥөтө өссө алта улахан нэһилиэккэ холбонуоҕа.
Саҥа информационнай үйэ кэлбитинэн, инновация, цифровой сайдыы уонна инфокоммуникационнай технология миниистирэ Анатолий Семенов эҕэрдэлээтэ: «Өрөспүүбүлүкэ үрдүнэн оптика 157 нэһилиэккэ тардылынна, ол эрэн, биһиги манан тохтуур санаабыт суох. Инникитин хас биирдии улууска тиийэн, бары нэһилиэктэри түргэн интэриниэтинэн хааччыйарга дьулуһуохпут. Улуустарга аныгы IT-кииннэри арыйан үлэлэтиэхпит», — диэн инники былааннарын кэпсээтэ.
Кини Үөһээ Бүлүүгэ тиийэн, сибээһи тургутан көрбүтүнэн, «Instagram»-ҥа быһа сибээс холкутук ыытыахха сөп, видео харбакка үчүгэйдик көстөр диэн иһитиннэрдэ.
Бүлүү бөлөххө аан дойдуну кытта ситимниир сыыдам сибээс бастакынан Мииринэйтэн Сунтаарга кэлбитэ.
Үөһээ Бүлүү улууһун баһылыга Владимир Поскачин кэлэр үс сыл иһигэр оройуон бары нэһилиэктэрэ түргэн тэтимнээх Интэриниэккэ холбонуохтаахтарын туһунан эттэ.
Ил Дархан тоһоҕолоон бэлиэтээбитинэн, оптика тыа сиригэр тиийдэҕинэ, баалабай эрэгийиэннээҕи бородууксуйа 5% үрдүөҕэ, улуус социальнай-экономическай сайдыытыгар сүрүн тирэх буолуоҕа.
«Бүлүү экспреһэ» үлэлиэҕиттэн, «Ростелеком» интэриниэти сөкүүндэҕэ 10 гигабит түргэннээх биэрэр. Тэрилтэ Саха сиринээҕи салаатын дириэктэрэ Константин Войтеховскай нэһилиэнньэҕэ хааччаҕа суох тугу баҕарар хачайдыыр тарыып былааҥҥа баарын туһунан билиһиннэрдэ. Чааһынай дьон сөкүүндэҕэ 100 мегабит түргэннээх сибээскэ холбонуохтарын сөбүн, инникитин сыана үрдүөн оннугар төттөрүтүн түһэр чинчилээҕин бэлиэтээтэ.
«Ростелеком» Бүлүү, Үөһээ Бүлүү, Сунтаар нэһилиэктэрин улахан аҥаардарын оптикаҕа холбуур былааннаах.
Аныгыс түһүмэҕинэн оптика Кыһыл Сыырынан уонна Дьокуускайынан салгыы Кэбээйигэ диэри тардыллыаҕа. Онон түргэн Интэриниэт Сахабыт сирин киин куоратын соҕуруу уонна арҕаа өттүттэн ситимниэҕэ.
Айсен Николаев этэринэн, оптиканы Уус Ньараттан Халыма улуустарыгар тардар туһунан кэпсэтии, бырайыагы дьүүллэһии бара турар.
«Бу бырайыак өрөспүүбүлүкэҕэ улахан суолталаах. Уһук Илини сайыннарыы национальнай бырагырааматын чэрчитинэн, түргэн интэриниэти салгыы ыраах улуустарга киллэрэргэ, РФ Сибээскэ министиэристибэтин уонна «Ростелеком» хампаанньаны кытта үлэлэһэбит», — диир кини.
Оччотугар тыа сиригэр докумуоннары электроннай көрүҥҥэ көһөрүү, судаарыстыба өҥөлөрүгэр онлайн холбонуу, интэриниэт нөҥүө араас өҥөнү, аһы-таҥаһы, туттар тэрили сакаастааһын сыыдамсыйыа, үөрэххэ, үлэҕэ араас вебинардары, видео-кэмпириэнсийэни туһаныы киэҥник тарҕаныа этэ. Холобур, дьон дьиэлэригэр олорон омук сиригэр тахсар пааспары сакаастыахтара, хайа талбыт быраастарыгар суруттарыахтара, барыта электроннай буолан, докумуон эккирэтэн уочаракка тураллара да аҕыйыа.
Марианна Тыртыкова, «Саха сирэ», edersaas.ru