Бэс ыйын 12 күнүгэр, Арассыыйа күнүгэр, Дьокуускай куоракка Сунтаар улууһун Бүлүүчээниттэн төрүттээхтэр самаан сайыны көрсөр үрүҥ тунах ыһыахтара буолан ааста.
edersaas.ru, Зинаида Игнатьева
Түһүлгэ Бүлүүчээнтэн төрүттээх сахалыы сиэдэрэй таҥастаах дьонунан, күлэн-үөрэн чаҕылыспыт оҕолорунан туолла. Быйылгы ыһыах Бүлүүчээнтэн төрүттээх саха саарына, биллиилээх государственнай, политическай, уопсастыбаннай диэйэтэл, «Хотугу Сулус» уордьан бастакы кавалера В.Г. Павлов төрөөбүтэ 90 сылыгар ананар буолан, кини олоҕун кэпсиир паннолар түһүлгэни төгүрүччү ыйаммыттар. Кыыдааннаах кыһыны аһаран, ахтылҕаннаах күөххэ үктэммит дьон, күө-дьаа кэпсэтии бөҕө буола сырыттылар… Ыһыаҕы аһыы сиэрэ-туома толорулунна, Сунтаар улууһун, Бүлүүчээн нэһилиэгин баһылыктарын, өрөспүүбүлүкэ атын улуустарын ыҥырыылаах ыалдьыттарын ыһыаҕынан эҕэрдэлэрэ этилиннилэр. Мустубут дьоҥҥо эдэр кыргыттар сахалыы кэрэ үҥкүүнү бэлэхтээтилэр. Минньигэс астааҕынан аатырар эдэр асчыт «Бүлүүчээн» диэн туордун аҕалан барыларын үөрдэ соһутта.
Салгыы үлэҕэ, үөрэххэ, көргө-нарга ураты көҕүнэн аатырар нэһилиэк араас күрэҕин тардан кэбистэ. Ол курдук, сахалыы таҥас, спортивнай көрүҥнэр, «Байанай» күрэҕэ, В.Г.Павлов туһунан викторина ыытылыннылар. Күрэхтэһиилэргэ да, викторинаҕа да кэлбит дьон бары көхтөөхтүк кытыннылар.
В.Г.Павлов уола Владимир Владимирович кэргэнэ Лена Николаевналыын, кыыһа Валентина Владимировна уолунаан, бииргэ төрөөбүттэрэ Надежда уонна Галина Гавриловналар, оҕолорунаан, сиэннэринээн ыһыах күндү ыалдьыттара буоллулар. Кинилэр ортолоругар сиэн Павлов Владимир Гаврилович сүүрэн моторуйар…
Ыһыах мецената Бүлүүчээҥҥэ төрөөбүт Алексеев Афанасий Павлович ийэтинээн, бииргэ төрөөбүттэринээн кэлэн ыалдьыттаан ыһыах өссө киэркэйдэ. Афанасий ыһыах ыытылларыгар харчынан күүс-көмө буолбутун тэрийээччилэр махтана бэлиэтээтилэр.
Оттон ыһыах күрэхтэһиитин кыайыылаахтара бары бириис ылан үөрүүлэрэ-көтүүлэрэ үрдээтэ. Бириистэри ПАВЛОВ В.Г. оҕолоро, балтылара уонна Алексеев А.П. туруоран дьон-сэргэ махтал тыла элбэхтик кинилэргэ ананна.
Сахалыы ас арааһа ыһыах сандалытыгар кэлбит дьону барытын күндүлүү, маанылыы дэлэйдик ууруллубуттар.
Ыһыах хойукка диэри дьон сэргэ күлүүтүнэн-үөрүүтүнэн, оһуохай дуораанынан оргуйан олордо!
Владимир Гаврилович аата элбэхтик ааттанна. Кини олорон ааспыт чаҕылхай олоҕо элбэхтик кэпсэннэ, сырдатылынна !
edersaas.ru саайтка анаан Зинаида Игнатьева