Уопсастыба

Бүлүү Балаҕаччытыгар «Мастаах» кэпэрэтиипкэ «Туймаада» хампаанньа 31-с хотоно тутуллан бүттэ

Бүлүү улууһун Балаҕаччытыгар “Мастаах” тыа хаһаайыстыбатын производственнай кэпэрэтиибэ 200-тэн тахса ынах сүөһүнү иитэр. Бу ааһан эрэр нэдиэлэ уһук нэһилиэк олоҕун устуоруйатыгар көмүс буукубаларынан суруллар бэлиэ түгэни бэлэхтээтэ. Ол курдук, Кан Терешкин дириэктэрдээх “Хаҥалас-Тутуу” ХЭУо толору механизациялаах, үүт блоктаах, 120 ыанньык ынах туруохтаах сырдык, киэҥ хотонун аныгы технологиянан тутан, хаһаайыстыба салалтатыгар туттарда.


Эбийиэк букатын кылгас кэмҥэ хаачыстыбалаахтык тутуллубутун бэлиэтиир сиэрдээх. Кан Терешкин маннык тутууга уопуттаах уонна сатабыллаах салайааччы буолан, сайын алларанан суола-ииһэ быстар дойдуга сааһыары, кыһыҥҥы суолу баттаһа, матырыйаалы тиэйэн илдьэн, тута саҕалаабыттара. Онтон бэс ыйыттын ис-тас уонна бетон үлэтин, уотугар-күөһүгэр тиийэ, силигин ситэрдилэр. Кан хамаандата салгыы аны Мэҥэ Хаҥалас Павловскайыгар эмиэ 120 миэстэлээх хотону тутууга турунна.

“Мастаахтар” үөрүүлэрэ үрдэ суох. Хаһаайыстыбаҕа 240 ынах турар комплекса тутуллуохтааҕын туһунан  Тыа хаһаайыстыбатын министиэристибэтин былааныгар киирэн сылдьар. Ол аата, эһиил 2-с уочаратын  туттарыахтара. “Мастаах” кэпэрэтииби Максим Яковлев диэн эдэр киһи салайар. Кэпэрэтиип эһиил тастан ынах эбии атыылаһан, хаһаайыстыбатын кэҥэтэр былааннаах. ТХПК саҥа хотонун, “Туймаада” ҮХАПХ АУо-тан кыра бырыһыаҥҥа иэс ылан, 41 мөл. 646 тыһ. солкуобайга туттарда. Онтун толуйуу харчытын ыллаҕына, төлөһүөхтээх. Быйыл өрөспүүбүлүкэ бүддьүөтүттэн көрүллүбүт субсидия үбэ сарбыллан, федеральнай субсидия кэлэрин күүтэллэр. Оттон өрөспүүбүлүкэ ирээтин эһиил биэрэргэ эрэннэрэр.

Хаҥастан уҥа: Кан Терешкин, Александр Васильев уонна Максим Яковлев аахтаҕа илии баттыыллар

 

Хотон толору хааччыллыылаах. Бүлүү улууһунааҕы ТХУ салайааччыта Павел Иннокентьев

 

 

Үөрүүлээх түгэҥҥэ “Туймаада” хампаанньаттан генеральнай дириэктэр Александр Васильев уонна хампаанньа хапытаалынай тутууга салаатын салайааччытын солбуйааччы эмиэ Александр Васильев (тутуу хаамыытын, хаачыстыбатын сирэй хонтуруоллаабыт инженер) тиийэ сырыттылар. Генеральнай дириэктэр эбийиэги үлэҕэ тутар-туттарар аахтаҕа “Мастаах” ТХПК бэрэссэдээтэлэ Максим Яковлевтыын уонна бэдэрээттэһэн туппут “Хаҥалас-Тутуу” ХЭУо генеральнай дириэктэрэ Кан Терешкинниин илии баттаста. “Туймаада” хампаанньа былырыын 6 хотону хонтуруоллаан уонна үбүлээн туттарбыта. Быйыл Павловскай киэнин кытта 2 буолуоҕа. “Туймаада” ҮХАПХ 2011 сылтан саҕалаан, “Мастаах” ТХПК киэнин аахтахха, барыта 31 хотону уонна 7 хортуоппуй уурар-харайар эбийиэги туттарда.

Манна сыһыаран эттэххэ, бу нэдиэлэ саҕаланыытыгар Хаҥалас улууһун Улахан Ааныгар Ил Дархан э.т. Айсен Николаев өрөспүүбүлүкэ тыатын хаһаайыстыбатын сайдыытын дьүүллэһэр мунньахха “урукку сыыһалары хатылаабакка, ол эбэтэр олус улахан хотоннору тутуунан үлүһүйбэккэ, билиҥҥи хаһаайыстыбалар кыахтарыгар дьүөрэлээх уонна тыа сирин үлэһит дьонун сэҥээриитин ылбыт 40-ча мөлүйүөҥҥэ тутуллар 120 сүөһүгэ суоттаммыт “Туймаада хотоннорун” сир ахсын киэҥник тарҕатар” тоҕоостооҕун ыйда. Итиэннэ Айсен Сергеевич улахан эбийиэктэр судаарыстыба суотугар тутуллуохтаахтарын, “Туймаада” ҮХАХ АУо базатыгар тыа хаһаайыстыбатын үбүлүүр пуонда тэриллиэхтээҕин, ол сыалга капитализация быһыытынан өрөспүүбүлүкэ бүддьүөтүттэн сыл аайы 100-200 мөл. солк. харчы тиксэриллиэхтээҕин эппитин тыа сирин үлэһит дьоно, ол иһигэр “мастаахтар”, сэргии-кэрэхсии иһиттилэр.

Василий НИКИФОРОВ, «Саха сирэ» хаһыат, edersaas.ru

Александр ВАСИЛЬЕВ (тутааччы) хаартыскаҕа түһэриитэ

 

1
0

Добавить комментарий