Бүлүү бааһынайдара уонна кэпэрэтииптэрэ улуустааҕы ассоциация тэриннилэр

Бүлүү куоракка “Туймаада» хампаанньа генеральнай дириэктэрин солбуйааччы, Саха сиринээҕи АККОР бэрэсидьиэнэ Александр Артемьев кэлбитигэр түбэһиннэрэн, улуус бааһынай хаһаайыстыбаларын, производственнай кэпэрэтииптэрин салайааччылара түмсэннэр, ассоциация тэриннилэр.

Бүлүү улууһугар 78 бааһынай хаһаайыстыба баар. А.В.Кырбасова “Илин”, И.И.Ионов “Сиккиэр”, А.К.Харлампьев “Тускул” хаһаайыстыбалара өрөспүүбүлүкэҕэ биллэр-көстөр үлэлээхтэр. Урут Бүлүү улууһуттан АККОР-га биирдиилээн хаһаайыстыбалар киирбит буоллахтарына, улуус таһымнаах түмсүү тэриллибэккэ, бааһынай хаһаайыстыбалар сүүйтэриилээх балаһыанньаҕа хаалаллара кистэл буолбатах.

Тэрээһин мунньахха АККОР үлэтин-хамнаһын, сыалын-соругун “Туймаада” ҮХАПХ генеральнай дириэктэрин солбуйааччы, АККОР бэрэсидьиэнэ Александр Артемьев билиһиннэрдэ. Тыа хаһаайыстыбатын салаата сайыннарыыга бэйэтин көрүүлэрин олоххо хорутуулаахтык киллэрэн испит миниистири бүлүүлэр үчүгэйдик билэллэр. Александр Еремеевич миниистирдиир кэмигэр Бүлүү улууһуттан 30-тан тахса саҕалааччы фермер куонкуруска кыайан грант үбүн ылбыта, хас эмит сүүһүнэн сүөһүлээх производственнай кэпэрэтииптэр чэбдигирдии бырагырааматыгар хапсан балаһыанньалара көммүтэ, толору механизациялаах хас да хотон тутуллубута.

А.Е.Артемьев АККОР бааһынай хаһаайыстыбалары эрэ буолбакка, кэпэрэтииптэри эмиэ түмэр уопсастыбаннай тэрилтэ буоларын тоһоҕолоон бэлиэтээтэ. Өрөспүүбүлүкэттэн 1074 хаһаайыстыба ассоциация кыттыылааҕын быһыытынан Россия реестригэр эрдэ киирбит, билигин ким үлэлиирин, үлэлээбэтин чуолкайдааһын ыытыллар. АККОР-га хаһаайыстыбалар баҕа өттүлэринэн киирэллэр.

А.Артемьев үлэ дьоно, тыа хаһаайыстыбатын управлениелара, улуустар, нэһилиэктэр дьаһалталара сайдыыга туһуланар биир санаанан үлэлиир тиһиктэрин оҥоро сылдьарын аҕынна. Инники өттүгэр “Дьиэ кэргэн фермата”, “Саҥа саҕалааччы фермер” курдук граннаах куонкурустар бастакы түһүмэхтэрэ ассоциация иһинэн улуустар таһымнарыгар ыытыллыахтарын бэлиэтээтэ.

Мунньах кыттыылаахтара кандидатуралары дьүүллэһии кэнниттэн Бүлүү улууһунааҕы ассоциация бэрэссэдээтэлинэн тыа хаһаайыстыбатын управлениетын салайааччытын солбуйааччынан үлэлиир уопуттаах исписэлиис В.М.Гаврильеваны биир санаанан таллылар. Түмсүү үлэтин сүрүннүүр сэбиэккэ А.В.Кырбасова (Кыргыдай), И.И.Ионов (Дьөккөн), В.В.Иннокентьева (Тылгыны), В.Е.Потапов (Тааһаҕар) уонна А.А.Кондратьев (“Сыа Бүлүү” кэпэрэтиип) талыллан киирдилэр. Мунньаҕы салайан ыыппыт Бүлүү улууһун баһылыгын бастакы солбуйааччы Иван Евсеев саҥа тэриллибит түмсүү көхтөөхтүк үлэлиэҕэр, тыа хаһаайыстыбатын салаатын оҥорон таһаарааччыларын интэриэстэрин туруулаһыаҕар эрэнэрин эттэ.

Николай КУПРИЯНОВ, «Олох суола» хаһыат, edersaas.ru сайтка анаан

Бүлүү к.