Сотору учуонайдар бөлөхтөрө Бүлүү бөлөх улуустарын наука өттүнэн чинчийиигэ ылсыаҕа.
Бүлүү бөлөх улуустарын экология өттүнэн туругун уонна бу сиргэ-уокка олорор нэһилиэнньэ доруобуйатын наука өттүнэн биир кэлим чинчийии бырагырааматынан научнай-чинчийэр үлэлэри толорооччулар быһаарылыннылар.
edersaas.ru
СӨ Үүнэр көлүөнэ пуондатын Үрдүкү сэбиэтэ бу бырагыраама үс хайысхатынан үлэни толорооччу-тэрилтэлэри кытта түмүгү таһаарда. Санатан эттэххэ, “2019-2023 сылларга Бүлүү бөлөх улуустарын экологиятын туругун уонна бу сиргэ-уокка олорор нэһилиэнньэ доруобуйатын биир кэлим научнай чинчийиилэр бырагыраамалара” СӨ бырабыыталыстыбатын, “СӨ Үүнэр көлүөнэтин тус сыаллаах пуондата” кэмиэрчэскэйэ суох тэрилтэ уонна “АЛРОСА” АХ икки ардыларыгар хардарыта бииргэ үлэлэһии туһунан сөбүлэһии чэрчитинэн олоххо киллэриллэр.
Үүнэр көлүөнэ тус сыаллаах пуондатыгар научнай-чинчийэр үлэлэлэри толорооччулары талыыга процедуралары (закупочнай) ыытарга этиллибитэ. Бырагыраама оҥоһуллар кэмигэр холбоһуктаах улахан үлэ ыытылынна, СӨ профильнай министиэристибэлэрин (бастатан туран, Үөрэх уонна наука, Экология, айылҕаны туһаныы уонна ойуур хаһаайыстыбатын), биэдэмэстибэлэр икки ардыларынааҕы хамыыһыйаны кытары элбэх ахсааннаах сөбүлэһии түмүгүнэн, тэхиниичэскэй сорудахтар уонна симиэтэлэр бигэргэтиллибиттэрэ. СӨ Наукатын учуонайдарын холбоһуктаах сэбиэттэрин мунньахтара ыытылынна, научнай-чинчийэр үлэлэр бырайыактара талылыннылар, чинчийиилэргэ үс хайысхаларынан наадалаах докумуоннар бэлэмнэннилэр. Процедуралар (закупочнай) түмүктэринэн пуонда Үрдүкү сэбиэтэ толорооччулары кытары: М.К.Аммосов аатынан ХИФУ профессор Д.Д.Саввинов аатынан Хотугу сир прикладной экологиятын научнай-чинчийэр институтун, “М.К.Аммосов аатынан ХИФУ” ВПО ФГАОУ (толорооччу – Мэдиссиинэ института) уонна РНА СС П.И.Мельников аатынан Ирбэт тоҥ институтун дуогабарга илии баттааһын бигэргэтилиннэ.
“Бу наука тэрилтэлэрэ былааннаммыт үлэлэри толорорго наадалаах уонна кыахтаах учуонайдардаахтар уонна исписэлиистэрдээхтэр, кинилэр Саха сирин сиригэр-уотугар маннык үлэлэри ыытар үөрүйэхтээхтэр. Кылаабынайа, Бүлүү өрүс тардыытыгар сыста сытар сиргэ-уокка уонна манна олорор дьон доруобуйатыгар барыллаан научнай-чинчийэр үлэлэргэ матырыйааллардаахтар. Номнуо бу сайын (эпидемиология балаһыанньата туруктаннаҕына), Бүлүү бөлөх оройуоннарыгар учуонайдары – экологтары, эмчиттэри, ирбэт тоҥу үөрэтээччилэри илдьэ, чинчийиилэр улахан аҥаардарын ыытыы былааннанар”, – диэн СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров бэлиэтээн эттэ.
Бырагырааманы олоххо киллэрии уопсай суумата 138 мөлүйүөн солкуобайынан сыаналанар. 2020 сыллаахха АЛРОСА научнай-чинчийэр үлэлэри үбүлүүргэ 41,4 мөлүйүөн солкуобайдаах үбү ыытыаҕа. Аахсыйатын 33% өрөспүүбүлүкэҕэ туһулуур алмаастаах хампаанньа Үүнэр көлүөнэ тус сыаллаах пуондатын кытары бииргэ үлэлээһиннэригэр уруккуттан үгэстэрдээх. Ол курдук, 2011-2019 сылларга АЛРОСА баҕа өттүнэн үп көрбүтүн суотугар өрөспүүбүлүкэҕэ 30-тан тахса бастакы уочараттаах эбийиэктэр – оскуолалар, балыыһалар, успуорт дьиэлэрэ, Култуура дьиэлэрэ уо.д.а. тутуллубуттара. Билигин АЛРОСА үбүн суотугар Нам оройуонун Нам, Уус Алдан улууһун Бороҕон, Мэҥэ Хаҥалас улууһун Майа сэлиэнньэлэригэр Култуура дьиэлэрэ, Үөһээ Дьааҥы улууһун Баатаҕай сэлиэнньэтигэр балыыһа комплекса тутуллаллар. Ону сэргэ, хампаанньа Үүнэр көлүөнэ пуондатын нөҥүө Үүнэр көлүөнэ паркатын бырайыагын үбүлүүр уонна Бүлүү бөлөх улуустарын ыраас хаачыстыбалаах уунан хааччыйыы бырагырааматын үбүлэһэр.
“Саха сирэ”, edersaas.ru сайтка анаан
“АЛРОСА” АХ (ПАО) пресс-сулууспата.