Бүлүү бөлөх улуустарга саамай улахан балыыһа бу сыл бүтүүтэ үлэҕэ киириэҕэ
Бүлүү куоракка Бүлүү бөлөх улуустарыгар саамай улахан балыыһа бу сыл бүтүүтэ үлэҕэ киириэҕэ.
Балыыһа 2016 сылтан тутуллар. Ил Дархан Айсен Николаев Бүлүүгэ сылдьар кэмигэр тутуу үлэтин билистэ. Тутааччылар балыыһа бастакы уочарата 2022 сыл бүтүүтэ үмүрүтүллүө диэн эттилэр. «Тутааччылар балыыһаны тутан бүтэрэр санаалаахтар. Тутуу хаамыытын судаарыстыбаннй сакаасчыт сулууспата уонна СӨ Доруобуйаҕа харыстабылын министиэристибэтэ кытаанах хонтуруолга тутан олороллор. Онон саҥа тутуу бу сыл бүтүүтэ үлэҕэ киириэ диэн бары эрэнэбит», — диэн Айсен Николаев эттэ.
Ил Дархан быһаарбытынан саҥа балыыһа улуустар икки ардыларынааҕы киининэн буолуоҕа. Комплекска Бүлүү бөлөх улуустар олохтоохторун сэргэ Кэбээйи улууһун чугас сытар нэһилиэнньэлээх пууннара үрдүк таһымнаах мэдиссиинискэй көмөнү ылыахтара. Эндопротезированиеҕа сыһыаннаах эпэрээссийэлэр оҥоһуллуохтара. Лапораскопическай эпэрээссийэлэр ыытыллыылара элбиэҕэ.
«Балыыһа аныгы ирдэбилгэ толору эппиэттиир буолуоҕа. Ол быһыытынан аныгы мэдиссиинискэй оборудованиеларынан хааччыллыаҕа. Олор атыылаһыллан Бүлүү куоракка аҕалыллыбыттара. Улахан кыамталаах МРТ (магнитнай-резонанснай томограф) таҥыллан туруоруллуоҕа. Манна Бүлүү бөлөх улуустарын олохтоохторо көрдөрүөхтэрэ. Эндопротезированиеҕа аналлаах киин баар буолуоҕа», — диэн Айсен Сергеевич иһитиннэрдэ.
Балыыһа комплексын уопсай иэнэ 3000 кв м. Уопсай блокка приемнай отделение, ас-үөл блога, рентген-диагностическай кэбиниэтэ, лабораториялар, палааталар, быраастар кэбиниэттэрэ баар буолуохтара. Икки этээстээх хирургическай отделение туспа блокка үлэлиэҕэ. Саҥа эбийиэк «Доруобуйа» национальнай бырайыак чэрчитинэн тутуллар. Генеральнай бэдэрээтчитинэн «Кинг-95» тэрилтэ буолар. Балыыһа иккис уочаратын тутуу кэлэр сылтан саҕаланан 2025 сылга түмүктэниэҕэ.
«Кэлэр сылтан эбийиэк иккис уочаратын бырайыага оҥоһуллан түмүктэниллибитин кэнниттэн тутуу үлэтэ саҕаланыаҕа. Онон 2025 сылга диэри балыыһа комплескса барыта үлэҕэ киириэҕэ диэн эрэнэбит», —диэн Айсен Николаев быһааран биэрдэ.