«Бүлүү» айан суолугар дьон өлүүлээх быһылааҥҥа таһаҕас массыыната буруйдаах
Бэҕэһээ, олунньу 23 күнүгэр, киэһэ 8 чаас 30 мүнүүтэ саҕана “Бүлүү” айан суолун 143-с биэрэстэтигэр дьон өлүүлээх суол быһылаана таҕыста. Дьокуускайтан айаннаан иһэр “Toyota Hiase” уонна Бэрдьигэстээх өттүттэн кэлбит “MMC FUSO” утарыта сааллыыларын түмүгэр үс киһи суорума суолланна, үс киһи ыараханнык эчэйдэ.
Суолга куттал суох буолуутун судаарыстыбаннай иниспиэксийэтин Саха сиринээҕи управлениетын салайааччыта Самсон Чупров Горнай улууһунааҕы иниспиэктэрдэр оҥорбут барыллааһын түмүктэрин иһитиннэрбитинэн, таһаҕас тиэйэр массыына суоппара утары тахсыбыта сабаҕаланар. Микрооптуобус суоппара, 1987 сыллааҕы төрүөх уол уонна кинилиин сэргэстэһэ иннигэр олорор аҕата, 1961 сыллааҕы төрүөх киһи, итиэннэ салон иһигэр аҕатын кытта айаннаан иһэр 2 саастаах уол оҕо күүстээх охсууттан тута өлбүттэр.
Тыыннаах хаалбыт түөрт киһиттэн сирэйин эчэппит киһини медиктэр көрөн баран, дьиэтигэр ыыппыттар. Илиилэрин-атахтарын тоһуппут икки пассажиры балыыһаҕа киллэрбиттэр. Үһүс эмсэҕэлээччи Бэрдьигэстээх киин балыыһатыгар ыарахан туруктаах, өйө суох сытар. Кини төбөтүн уҥуоҕа үлтүрүйбүт. Дьокуускайтан көмөҕө нейрохирург тиийбит. Билигин биллэринэн, эмсэҕэлээччилэр бары Бүлүү улууһугар айаннаан испиттэр.
Василий НИКИФОРОВ, «Саха сирэ» хаһыат, edersaas.ru
Хаартыскаҕа: ааспыт ый бүтүүтүгэр «Бүлүү» федеральнай айан суолугар эмиэ үс киһи өлүүлээх суол быһылаана тахсыбыта.