Бүгүн СӨ ОДьКХ уонна энергетикаҕа миниистирэ Дмитрий Садовников социальнай ситимнэргэ тахсан, дьон-сэргэ ыйытыытыгар хоруйдаата.
Дьэ, туох туһунан миниистиртэн ыйыттылар?
Соһуйуоххут иһин, Дьокуускай олохтооҕо Виктория Сергеева дьиэбит олус сылаас диэн үҥсэргээтэ. Онуоха миниистир теплоисточниктарга (батарыайаларга) итиини сүрүннүүр регуляторы туруоруҥ диэн сүбэлээтэ. Ол гынан баран сылааһынан хааччыйааччылар анал нормативынан үлэлиэхтээхтэрин эттэ.
— Хомунаалынай төлөбүрүгэр бэриллэр субсидияны уһатыахтара дуо?
— Долгуйарга төрүт суох.
М.Жиркова: — Чааһынай секторга бөх тоҕор баахтар тоҕо суохтарый?
— Бөх тоҕор дьааһыктары (туочукалары) тэрийиинэн муниципальнай тэриллиилэр дьарыктаналлар. Олорор сиргитигэр МТ-тэн ыйыталаһаргыт ордук буолуоҕа. Эйиэхэ ким ити өҥөнү төлүүргэ счет туруорбутуй, ол онтон ыйыталаһыҥ.
Никаноров: — Бүлүү оройуонун полигонун туһунан ыйыталаһабын.
— Бүлүү улууһа бу бопуруоска көхтөөхтүк ылса сылдьар. Ааспыт нэдиэлэҕэ СӨ Айылҕа харыстабылын миниистирэ Сахамин Афанасьевтыын ити боппуруоһунан сибээстээн бара сылдьыбыппыт. Чинэкэ бөһүөлэгэр бөх тоҕор полигон оҥоһуллуоҕа. Ол эрээри тустаах чинчийиини ааһыахтаах. Биһиги бөҕү таҥастааһынынан (переработка) дьарыктаныахтаахпыт. Манан дьарыктанааччылары бырабыыталыстыба өйүө диэн эрэнэбин.
— Өскөтүн уоту каасса нөҥүө төлөөтөххө, 2,7 бырыһыаны тоҕо эбии туталларый?
— Билигин хомунаалынай өҥө төлөбүрүн быһалыы, автоматизированнай төлөөһүн биһирэнэр буолла. Дьон тэйиччиттэн, дьиэҕэ олорон төлүүллэрин туһугар. Ол иһин автоматизированнай төлөөччүлэртэн кыра бырыһыан тутуллар. Оттон кассир үлэтин төлүөххэ наада, ол иһин ити тутуллар бырыһыантан киниэхэ хамнас ааҕыллар.
— Баатаҕайга туруоруллубут күн күүһүнэн үлэлиир ыстаансыйа туох эмэ көдьүүһү биэрдэ дуо?
— Биэрэн. Бу ыстаансыйаны 2017 сыллаахха “Сахаэнерго” нөҥүө ылбыппыт. Ыстаансыйа үчүгэйдик үлэлиирин көрдөрдө. Быйыл 9 ый түмүгүнэн ыстаансыйа 750 мөл квт.ч. уоту оҥорон таһаарда. Ити түмүгэр 200 туонна дизельнэй оттук кэмчилэннэ. Күн уотун көмөтүнэн ороскуоттары сабыахха сөп. Маннык уустук суоллаах-иистээх Баатаҕай курдук ыраах сытар сиргэ абыраллаах. Энергетиктэр маннык тэриниилэрэ, хамсаныылара биһирэнэр. Тыал күүһүнэн үлэлиир Тиксиигэ тутуллубут ыстаансыйаттан эмиэ итиник көдьүүһү күүтэбит. Кэмчилээһин тахсыа диэн эрэнэбит.
Маны сэргэ миниистир Дмитрий Садовниковтан ыраас уу боппуруоһун эмиэ токкоолостулар. Миниистир этэринэн, билигин нэһилиэнньэ 54 бырыһыана ыраас уунан хааччыллан олорор. Ыраас уу кыбартыыраҕа тиийэ кэлиитигэр болҕомто ууруллар эбит. Үгүс муниципальнай тэриллиилэр уунан хааччыйыы барылын оҥорботохтор. “Ыраас уу” бырагырааманан Тутуу министиэристибэтиттэн үбүлээһин көрүллүбүт. Маннык хабааннаах үлэ Покровскайга, Өлүөхүмэҕэ ыытыллар. Эһиил Бэрдьигэстээх уонна Үөһээ Бүлүү боппуруостарын быһаарыахпыт диэн миниистир эрэннэрдэ. Бу муниципальнай тэриллиилэр ыраас уу бырагырааматын кыттыылаахтара эбиттэр. Хомойуох иһин, тустаах бырагыраамаҕа Таатта улууһа кыайан хапсыбатах.
Маннык уонна да атын ыйытыыларга Дмитрий Садовников толору хоруйдары биэрдэ.
Бэлэмнээтэ Женни Стрюкова.
Хаартыска: саайтан