Бүгүн, олунньу 16 күнүгэр, Дьокуускайга Өксөкүлээх Өлөксөй киинигэр, “Сүүрбэ биирис үйэҕэ сүтэн-оһон хаалбакка, өбүгэбит ситимэ Хатылыбар салҕанар…” диэн Чурапчы улууһун Хатылы нэһилиэгин сайдар-үүнэр кэскилин өйүүр сыаллаах Дьоро киэһэ ыытылла турар.
Татьяна Маркова, «Саха сирэ» хаһыат, https://edersaas.ru/
Сахалыы сиэринэн саламааттаах, алаадьылаах, сүөгэйдээх, күөрчэхтээх, баахылалаах, көбүөрдээх лэппиэскэлээх, мип-минньигэс барыанньалаах, итии үүттээх чээйдээх мааны сандалылар манна эһигини кэтэспиттэр.
Иистэнньэҥ имигэс илиитинэн тигиллэн, аттаһыллан, хатарыллан тахсыбыт араас малы, уус киһи уһаарбыт, таптайбыт тимир оҥоһуктарын удамыр сыанаҕа атыы-тутуу буолла.
Киэһэ 18 чаастан Дьоро киэһэни үөрүүлээхтик аһыы, эҕэрдэ кэнсиэр саҕаланна.
Дьон Чурапчы күөрэгэйэ Аграфена Кузьмина, Чурапчы эрчимнээх куолаһа Василий Кузьмин ырыаларын кэтэһэллэр, итиэннэ Чурапчыттан төрүттээх аныгы үҥкүүһүт, чаҕылхай сулус Диана Егорованы, Хатылы Далбар хотуттарын “Алгыс” үҥкүү ансаамбылын, Хатылы эдэр ыччатын “Чараҥ” үҥкүү ансаамбылын уо.д.а. талааннаах биир дойдулаахтарын көрсүөхтэрэ.
Кэнсиэр кэмигэр талааннаах дьон оҥоһуктарынан аукцион ыытыллар.
Тэрээһинтэн киирбит үп спортивнай саала тутуутугар туһуланар.
Татьяна Маркова.