Өбүгэ оонньуута

Ааптар: 
Бөлөххө киир:

Өбүгэ оонньуута олоххо тула өттүттэн туһалаах, өскөтүн эн оҕо эрдэхтэн дьарыктаннаххына.

Кириэс Халдьаайы орто оскуолатыгар бу көрүҥҥэ дьарык кэнники кэмҥэ утумнаахтык барар. Бу күннэргэ “Өбүгэ оонньуута” II этнофестиваль ыытылынна. Тэрээһин оскуолабыт агротехнологическай статуһу ылбыта 10 cылыгар ананна. Күрэхтэһии икки күн устата үрдүк өрө көтөҕүллүүлээхтик ааста. Хас биирдии кылаастан үстүү уол, үстүү кыыс кытыннылар. Алын сүһүөх кылаас оҕолоро 5 көрүҥҥэ, онтон үөһээ кылаастар 6 көрүҥҥэ кииристилэр. Бу күн биир олус уустук көрүҥҥэ, наартаны ыстаныыга Хотугу многоборьеҕа Саха сирин призера, үөрэнээччибит Юрий Владимирович Кузьмин маастар кылаас көрдөрдө. Хабылык, хаамыска оонньуутугар  алын сүһүөх кылаас оҕолоругар 4-с кылаас  үөрэнээччилэрэ тэҥнээхтэрин булбатылар. Оттон наартаны ыстаныыга уонна көтөх ынаҕы туруорууга иккистэр күннээтилэр. Ойбонтон уулааһын кытаанах көрүҥҥэ эмиэ төрдүстэр ураты имигэстэрин көрдөрдүлэр.

Онтон үөһэ кылаастарга тутум эргиирэ эбиллэн биэрбитэ. Хас көрүҥ аайы оҕолор миэстэлэринэн пъедесталга тахсан истилэр уонна хамаанданан эмиэ тута биллэн иһэр буолан олус көхтөөх уонна тыҥааһыннаах, эбиитин туспа көрдөөх буолан оҕолор ис-истэриттэн үөрэ-көтө кытыннылар. Түмүк бөлөхтөрүнэн маннык таҕыста: I миэстэҕэ — 2, 4, 7, 10  кылаастар,  II миэстэҕэ – 1, 3, 5, ; кылаастар, III миэстэҕэ – 6, 9 кылаастар тахсан, үөрүү омунун биллилэр, оҕолорбут көрөөччүлэр, төрөппүттэр кулгаахтарын-харахтарын сымнаттылар. Аныгы үйэ буолан, оскуола спортивнай саалатыгар туох буола турарын быһа көрө олорбуппут.

Икки күн устата  ыытыллыбыт күрэхтэн дуоһуйууну ылбыт оҕолор барыта 132 мэтээли, 4 кубогы ким бэлэмнээх, ким дьулуурдаах ылла. Бу маны барытын агрооскуола  солбуйааччы дириэктэрэ, тэрээһин ааптара, Бысыина Матрена Егоровна дьиэ кэргэнэ үбүлээтэ. Маны таһынан, араас көрүҥнэринэн спорт бэтэрээннэрэ: Келина Анна Николаевна (волейболга, баскетболга, хайыһарга, остуол оонньууларыгар бэтэрээн),  Карбаканов Василий Петрович (буулдьанан уонна спортинг ытыытыгар өрөспүүбүлүкэ чөмпүйүөнэ, призера), Харитонов Александр Егорович (өрөспүүбүлүкэ үтүөлээх тренерэ), Габышев Василий Васильевич ( көҥүл тустууга өрөспүүбүлүкэ чөмпүйүөнэ, призера), Попов Сергей Павлович (өрөспүүбүлүкэ үтүөлээх тренерэ), Слепцова Евдокия Ивановна (остуол тенниһин бэтэрээнэ), Кузьмин Юрий Владимирович (спорт маастарыгар хандьыдаат), Саввин Дмитрий Александрович (Саха Өрөспүүбүлүкэтин 3,  Арассыыйа 2 төгүллээх , Европа чөмпүйүөнэ)  бэйэлэрин харчынан бириистэрин туттардылар.

Быйылгы оонньуу атахха элбэх көрүҥнээх буолла, эһиил оонньуулары наардаан көрүүһүбүт диэн физкультура учуутала Петр Михайлович Охлопков санаатын үллэстэр. Салгыы кэпсиир: “Кырдьык, “Өбүгэлэр оонньуулара” иккис сылын бэрт үрдүк таһымнаахтык ыытылыннылар, тэрийээччилэргэ, спонсордарга, судьуйаларга, учууталларга барҕа махтал буоллун. Түгэнинэн туһанан, физруктар Сивцева М. В. махталбыт муҥура суох. Ол курдук, хас эмэ сылы быһа сүрдээх сыаналаах спортивнай инвентардарынан хааччыйда. Холобур: баскетбол, футбол, волейбол мээчиктэринэн, теннис остуолларынан,тренажернай комплект, гиря,штанга, пьедестал, оҕо ыстанар наарталарын 3 көрүҥэ, кыра, ортоку, улахан, маамыкта быата — бу барыта Маргарита Власьевна сүүрэн-көтөн, комбинаттарга сылдьан, быһаччы кини кэпсэтиитинэн баар буолбута. Бу кэнники сылларга оҕолорбут доруобуйалара наһаа мөлтөөтө, туруктара намтаата. Бу барыта дьиэҕэ олорууттан, олохпут да дьайыыта уларыйда. Онон оҕолорбут туруктарын тупсарарга  маннык спортивнай инвентардар олус туһалаахтар уонна суолталаахтар диэн этэбит”.

Оттон судьуйаҕа 10, 11 кылаас оҕолоро көмөлөстүлэр.

Өбүгэ оонньуута эти-сиини, толкуйдуур дьоҕуру сайыннарар аналлаахтар. Бу маннык күрэхтэһиилэр кэмиттэн – кэмигэр ыытыллаллара хайҕаллаах. Хамсыкка хаайтаран олорбут кэммит оҕо аймах сүргэтин өрө көтөҕөр, сахатынан киэн туттар биир бэртээхэй тэрээһиммит өбүгэбит оонньуутун ыһыктыбакка илдьэ сылдьарбытыгар күүс буолуо диэн эрэнэбит.

Ирина Харайданова,  Томпо, Кириэс Халдьаайы

Хаартыскалары: ааптар тиксэрдэ

+1
0
+1
0
+1
0
+1
0
+1
0
+1
0
+1
0