Соторутааҕыта “Өбүгэ үгэһин утумнаан” диэн Олоҥхо уонна Хомус күннэринэн чэрчитинэн ыытыллыбыт баай ис хоһоонноох кэнсиэркэ сахалыы ырыаны, тойугу, хомуһу, төрүт дорҕоону, олоҥхону сэҥээрээччилэр муһуннулар.
edersaas.ru
Бу күн көрөөччүлэр Өксөкүлээх Өлөксөй аатынан Норуоттар доҕордоһууларын дьиэтин сценатыгар “Арассыыйа бриллиант-куолаһа” аат хаһаайыттара Варя Аманатованы, Александр Дьячковскай-Саарыны, виртуоз-хомусчут Альбина Дегтярева салайааччылаах «Айар Хаан» этно-бөлөҕү, норуоттар икки ардыларынааҕы музыкальнай күрэс кыайыылааҕа, «Эйэ» бириэмийэ хаһаайына «Кыл Саха» төрүт дорҕоон бөлөҕүн (сал. Анна Томская), фольклор норуоттар икки ардыларынааҕы бэстибээлин Гран-при хаһаайыннара, лауреаттара «Олонхо» тыйаатыр-устуудьуйа (сал. Светлана Лукина) иһинэн үлэлиир «Дьээ-буо» этно-фолк бөлөҕү (сал. Любовь Каратаева), Таатта улууһун «Дьолуо» фольклор ансаамбылын (сал. Людмила Цой) тутан олорон көрдүлэр.
СӨ култууратын үтүөлээх үлэһитэ, театральнай режиссер Светлана Лукина салайар “Олоҥхо” тыйаатыр-устуудьуйа икки улахан састаабыттан Саха сиригэр эрэ буолбакка, Арассыыйа тас өттүгэр биһирэнэр, биллэр артыыстар тахсыбыттарын бу кэнсиэр кэрэһилээтэ.
Ол курдук, “Олоҥхо” тыйаатыр устуудьуйа бастакы састаабыттан сылдьыбыт Варя Аманатова, Саарын, Амгаяна, Дархан, билиҥҥи иккис састаап Любовь Каратаева, Марианна Романова-Тайыына, Раиса Маркова, Иннокентий Птицын, Екатерина Новикова, Галина Самсонова, Трофим Миронов, Зинаида Григорьева, Марианна Толстякова, Лика Пономарева уо.д.а. кытыннылар.
Маны сэргэ, бу күн саҥа талааннар арылыннылар. Сахалыы куттаах Марианна Романова-Тайыына “Кыл сахалар” уонна Альбина Дегтярева хомуска доҕуһуолларынан “Этиттэрии анала” ырыанан сүрэхтэннэ.
Былатыан Ойуунускай «Дьулуруйар Ньургун Боотур» олоҥхотуттан быһа тардыыны Таатта улууһуттан фольклорнай бөлөх толоруутун көрөөччүлэр сэргээн иһиттилэр. Бу күн Таатта улууһун талааннара сахалыы ырыаны-тойугу ис истэриттэн иэйэн туран толорбуттарыгар көрөөччүлэр күүстээх ытыс тыаһынан махтаннылар. Кинилэр баай көстүүмнэрэ, толорор маастарыстыбалара сөхтөрдө.
Араас шоулар, уоттаах-күөстээх кэнсиэртэр элбэхтик ыытыллар кэмнэригэр дьиҥ сахалыы ырыалар, хомуска дьүһүйүүлэр, дэгэрэҥ ырыалар, олоҥхону толоруу, кылыһахтаах кырыымпа дорҕооно эппитигэр-хааммытыгар күүскэ иҥмитин уонна ханнык да бэйэлээх кэмнэргэ сахабын диэн киэн тутта этэр кыахтаахпытын “Өбүгэ үгэһин утумнаан” кэнсиэр дьиҥ-чахчы бигэргэттэ уонна астыннарда. Утум салҕанар!
Надежда ЕГОРОВА, “Саха сирэ” хаһыат, edersaas.ru