Дьокуускайга А.Е.Кулаковскай аатынан норуоттар доҕордоһууларын дьиэтигэр хотугу аҕыйах ахсааннаах норуоттар «Благословение Древней земли» диэн отчуоттуур кэнсиэртэрэ буолла. Бу туһунан биһиэхэ норуоттар доҕордоһууларын дьиэтин пресс-сулууспатыттан иһитиннэрдилэр.
Үөрүүлээх тэрээһин СӨ култууратын үтүөлээх артыыһа Валентин Исаков «Ымты» диэн эбэҥки норуотун сиэрин-туомун, үгэһин көрдөрүүтүнэн саҕаламмыт. Дьэ, ол кэннэ, эбэҥкилэр, эбээннэр, долганнар, дьүкээгирдэр, чукчалар үйэлэр тухары умнубакка илдьэ сылдьан, өрө тутан, ыччакка үөрэтэн-такайан, иҥэрэн кэлбит ураты духуобунай култуураларын, сиэрдэрин-туомнарын билиһиннэрбиттэрэ көрөөччүлэри улаханнык кэрэхсэппит, сэргэхсиппит.
— Эбэҥкилэр уруу сиэрин-туомун, эбээннэр «Буюсэмнэ» диэн булт сиэрин-туомун, долганнар Баай Байанайга сүгүрүйэр (Дьокуускайдааҕы култуура уонна ускуустуба кэллиэһин устудьуона, долганка Анна Туприна туруоруута), дьүкээгирдэр «Солзодьилпэ», муора көс олохтоох чукчаларын сиэрдэрин-туомнарын көрдөрбүттэрэ ытыс тыаһынан арыалланнылар. Ол курдук, СӨ култууратын үтүөлээх үлэһитэ, Эбээн-Бытантай улууһун бочуоттаах гражданина, РФ уопсай үөрэхтээһин бочуоттаах үлэһитэ, Степановтар-Ламутскайдар учуутал аймахтар удьуордарын утумун салайар, «Һэндэл» эбээн ууһун ытык кырдьаҕаһа Зинаида Никулина тугут төрөөтөҕүнэ туох сиэр-туом тутуһуллуохтааҕын туһунан кэпсээбитин саалаҕа мустубут дьон-сэргэ наһаа сэҥээрэн иһиттилэр. Ол курдук, кини кэпсээбититтэн, таба хотугу дойду олохтоохторугар олох бэлиэтэ буоларын, оттон тугуттар төрөөһүннэрэ олох салҕанарын бэлиэтэ буоларын биллибит. Дьэ, ол иһин, табалар төрөөһүннэрэ саҕаланарын диэки, кырдьаҕас, үөрүйэхтээх табаһыттар олохтоох миэстэлэрин булан, талан баран төрүөх үчүгэй буоларыгар, тугуттары сиэмэх кыыллартан, ууттан-хаартан, тыалтан-куустан харыстаан уонна сыллата таба төрүөҕэ үчүгэй буолан иһэрин туһугар сиэр-туом оҥороллор эбит.
Эбээннэр «Буюсэмнэ» сиэрдэригэр-туомнарыгар булчут буоларга уһуйууну Хабаровскайга ыытыллыбыт «Лики наследия — 2018» эрэгийиэннэр икки ардыларынааҕы бэстибээл лауреаттарынан буолбут «Долгунча» эбээн этно-фольклорнай ансаамбыл билиһиннэрдэ. Мантан көрөөччүлэр уол оҕо төрөөтөҕүнэ, хоту сир хоһуун дьоно булчут төрөөтө диэн улаханнык үөрэллэрин, дьолунан ааҕалларын эт кулгаахтарынан истэн олус кэрэхсээтилэр. Ол иһин аймахтар бу уолу иитиигэ улахан болҕомтолорун, кыһамньыларын ууралларын, уол оҕо бастакы улахан булда бу кини улахан киһи буолбутун кэрэһилиирин, сиэр-туом толорулларын көрдүлэр-иһиттилэр. Булчут буолуу сиэрэ-туома, анал ырыанан арыалланан эдэр булчукка таҥаһа-саба тигиллэрэ, булка туттар сэбэ-сэбиргэлэ бэлэмнэниллэрэ, бултаах-алтаах, байанайдаах булчут буоллун диэн анал киэргэл ойуу тигиллэрэ, бу сиэри-туому, үгэһи бу удьуор ууһуттан саамай кырдьаҕас, аҕа саастаах дьахтар тигэрэ кэпсэннэ.
Дьүкээгирдэр «Солзодьилпэ» сиэрдэрэ-туомнара эмиэ уратытынан сөхтөрдө. Ол курдук, балыктыы баралларыгар сиэри-туому хайдах толороллорун Татьяна Бандерова салайааччылаах «Колымчанка» вокальнай ансаамбыл толорон көрдөрдө. Манна даҕатан эттэххэ, бу ансаамбыл «Эхо тундры и тайги-2018 сыл» хотугу аҕыйах ахсааннаах норуоттар ырыаларын өрөспүүбүлүкэтээҕи бэстибээл-куонкуруһугар Гран-при хаһаайыннарынан буолбуттара. Кинилэр кыһыҥҥы томороон тымныыны аһаран Эбэ уһуктарыгар хоту дойду дьоно хайдах эҕэрдэлии көрсөллөрүн, этэҥҥэ балыктаан баран хайдах махтаналларын, оччоҕуна Эбэлэрэ хардары мичик гынарын билиһиннэрдилэр.
Долгутуулаах тэрээһин кэнсиэригэр «Гиркилэн» эбэҥки фольлорун кэлэктиибэ, «Аймулдан» уонна » Аюлна»эбээн ыччатын ансаамбыллара, «Долгунча» эбээн этно-фольклорнай ансаамбыла, «Колымчанка» дьүкээгир вокальнай ансаамбыла, Екатерина Слепцова, Мария Дмитриева, дьүкээгир мелодиһа Макар Курилов, Арылхан Лебедев, Александр Погодаев, «Индигир» дьахталлар ансаамбыллара, Люкуоде Ситдикова, Александр Погодаев, муора чукчаларын бэрэстэбиитэлэ Аурика Сухомясова кыттан үөрүүнү өссө үрдэттилэр, — диэн кэпсээтилэр.
А.Е.Кулаковскай аатынан норуоттар доҕордоһууларын дьиэтигэр художественнай самодеятельноһынан дьарыктанар кэлэктииптэр толкуйдаабыт сэргэх уонна болҕомтону тардар, сонурҕатар чаҕылхай бырайыактара көрөөччүлэри хотугу сир ураты кэрэ эйгэтигэр умсугутта, кэрэ күнүнэн күндүлээтэ, улаҕата көстүбэт туундаратыгар угуйда диэн чахчы да астынан, киэн туттан бэлиэтээтилэр.
Хаартыскалар: А.Е.Кулаковскай аатынан норуоттар доҕордоһууларын пресс-сулууспата