Өбүгэ үгэһин үйэтитэр үлэлэр

Бөлөххө киир:

Туймаада ыһыаҕын кэмигэр «Өбүгэ үгэһин үйэтитэн» диэн өрөспүүбүлүкэтээҕи быыстапка үлэлээтэ. Быыстапканы Өксөкүлээх аатынан Норуоттар доҕордоһууларын дьиэтэ, Дьокуускай куорат култуураҕа, духуобунай сайдыыга управлениета, норуот уус-уран оҥоһуктарын балаатата тэрийдилэр.

edersaas.ru


Манна сахалыы таҥаска, кыбытык тигиигэ, кылынан-сиэлинэн өрүүгэ, түүлээҕинэн иистэниигэ, куукуланы, сувениры  оҥорууга, маһынан уһаныыга оҥоһуктар турдулар. Араас улуустартан кэлэн, барыта 45 кыттааччы үлэлэрин туруорда. Кэнники кэмҥэ иис-уус сайдан, көрүҥэ, туһаныллыыта кэҥээн иһэр. Биллэрин курдук, билигин матырыйаал да элбэх, араас тиэхиньикэ, ньыма да үгүс. Онон маастардар үөрүйэхтэрин үрдэтэн, байытан иһэллэр, үксүгэр өбүгэ үгэстэриттэн тирэҕирэллэр. Онуоха бу маннык быыстапкалар улахан туһалаахтар. Туймаада ыһыаҕын кэмигэр элбэх киһи сылдьан кэрэни кэрэхсээтэ, уус тарбах айымньытын биһирээтэ.

Гран-при аатын Дьокуускайтан Ульяна Нохсорова ылла. Кини 161х134 миэтэрэ кээмэйдээх хартыынаны оҕуруоттан тиһэн оҥорбут. Хартыына ыйааһына – 9 киилэ. Хартыынаҕа Амма кэрэ айылҕата, Харама хайата, уот кыһыл сардааналар, үрүҥ аттаах кыыстаах уол ойууламмыттар.

Ульяна бэйэтэ Амматтан төрүттээх, ол иһин дойдутун айылҕатын хоһуйан, уруһуйдаан баран, ол үрдүгэр оҕуруонан тиспит. Кини алаадьы астаан, анаан тиийэн Харама Хайатын иччититтэн көрдөспүт, көҥүллэппит эбит.

Урут-уруккуттан иистэнэбин, уруһуйдуубун, мулине сабынан быысыбайдыыр этим. Кэлин оҕуруонан икона мөссүөнүн тиһэр кэмпилиэги атыылаһан баран, аны онон “ыалдьыбытым”. Түөрт сиэммэр иконалары быысыбайдаан биэрбитим, онтон улахан хартыыналары оҕуруонан тиһиэхпин  баҕаран кэлбитим. Төрөөбүт дойдум кэрэтин хоһуйарбар, дьоҥҥо тиэрдэрбэр чэпчэкитик үлэлээбитим, — диэн кини кэпсиир.

Дьэ, номинацияларга кимнээх кыайдылар?

Сахалыы иискэ – Маргарита Пестерева, Уус Алдан.

Кыбытык тигиигэ – маастардар “Ситии” түмсүүлэрэ, Сунтаар.

Маһынан уһаныыга – Василий Калининскай, Уус Алдан.

Кылынан өрүүгэ – Мария Петрова, Уус Алдан.

Түүлээҕинэн иистэнии  — Розалия Егорова, Дьокуускай.

Сувениры оҥорууга – Александр Ючюгяев, Таатта.

Куукуланы оҥорууга — Каролина Парфенова, Хаҥалас.

Маны тэҥэ 2-с, 3-с миэстэни ылбыт маастардар бэлиэтэннилэр.

Ангелина ВАСИЛЬЕВА, “Саха сирэ” хаһыат, edersaas.ru 

+1
0
+1
0
+1
0
+1
0
+1
0
+1
0
+1
0