Бу туһунан сэрийээл продюсера, хампаанньа сэрийээл сулууспатын салайааччыта Марфа Пермякова билиһиннэрэр:
— «Мин таптыыр спутнигым» 2021 сыллаахха уһуллубута. Сценарист — Даана Сард, режиссер — Елена Эверстова иккиэн бииргэ «Сүлүһүннээх таптал», «Сүлүһүннээх таптал. Эргиллии», «Олох диэн олох» бырайыактарга үлэлээбиттэрэ. Сэрийээл сүрүн оруолугар саха эстрадатын сулуһа Ольга Спиридонова–Ника оонньуур.
Режиссер кинини кытта үлэлиир судургутун бэлиэтээбитэ. Оннооҕор профессиональнай артыыстар ыарырҕатар сыаналарын бэрт итэҕэтиилээхтик оонньоото. Онон Никаны үгүс дьон төрүт атын амплуаҕа көрүөҕэ.
Сэрийээл ис хоһоонун кыратык сэгэтэн ыллахха, туораттан көрдөххө, толору дьоллоох олохтоох Уйгууна биир билсиһииттэн сылтаан олоҕор тосту уларыйыылар тирээн кэлэллэр. Эркин кини олоҕор саҥа тыыны, соһуччу үөрүүнү, дьоллоох түгэннэри бэлэхтиир. «Уйгууна дьиэ кэргэнин, үлэтин, олоҕун барытын уларытарга бэлэм дуо уонна тоҕо маннык буолла?» диэн ыйытыыга көрөөччү эппиэти бэйэтэ тобулуоҕа.
Таптал араастаах буолар. Ханна да халыып курдук тэҥ түбэлтэлэр баар буолбаттар. Хас биирдии киһи олоҕо атын-атын буоларын курдук, «Мин таптыыр спутнигым» ис тутула, ис хоһооно бу иннинэ көстүбүт сэрийээллэртэн төрүт атын. Биллэн турар, хас биирдии көрөөччү сэрийээл дьоруойун араастык ылынар — ким эрэ дьоруой оннугар бэйэтин туруоран көрөн өйдүү сатыыр, ким эрэ аһынар, ким эрэ кыыһыран мөҕөр. Уонна артыыстар дьоруойдарын санааларын-оноолорун, сыалларын-соруктарын төһө сөпкө тиэрдибиттэриттэн эмиэ тутулуктаах. Онон көрөөччүлэр бэйэлэрэ быһаарыахтара дии саныыбын.
Көрөөччү туһугар үлэлиибит. Биһиги ханаалбытын, биэриилэрбитин, сэрийээллэрбитин көрөллөрүгэр ис сүрэхпиттэн махтанабын. Онон кинилэр санаалара хайаан да учуоттанар. Биһиги хампаанньабыт сэрийээл устар үлэтин тохтоппокко салҕаабыта бэһис сыла. Ол гынан баран саха тэлэбиидинньэтин көрөөччүлэрэ номнуо киэһэ аайы сахалыы тыллаах сэрийээллэри көрөргө үөрэнэн хааллылар. Кинилэр олус кэтэһэн, көтүппэккэ көрөллөрүн рейтиммыт барытын сыыппаранан көрдөрө турар. Чаас аҥардаах сэрийээли көрөн баран: «Эмп курдук, кылгас баҕайы», — дииллэрин учуоттааммыт, билигин 40 мүнүүтэлээхтэри устабыт. Хас биирдии махтал тыла биһиги үлэбитин наһаа кынаттыыр. Түүннэри-күнүстэри туох баар сырабытын, дууһабытын ууран туран үлэлииргэ тирэх буолар.
Түгэнинэн туһанан, сэрийээл сулууспатын бары үлэһиттэригэр махталбын тиэрдиэхпин баҕарабын. Бары үлэлэригэр олус бэриниилээх, талааннаах дьон.
Сэрийээллэр ырыалара дьон биһирэбилин ылан, хит буоллахтарына испитигэр сэмээр үөрэбит. Анаан-минээн сэрийээлгэ диэн туспа тыллары суруйтарабыт, матыыбы айдарабыт, аранжировка оҥорторобут. Ити эмиэ бэйэтэ туспа сыралаах үлэ. «Мин таптыыр спутнигым» саундтрегын көрөөччүлэр эмиэ сэргиэхтэрэ диэн эрэнэбит.
Быйылгы сылга телевизионнай сезон саҥа сахалыы тыллаах сэрийээллэринэн хаһааҥҥытааҕар да баай буолуоҕа. Онон бүгүҥҥүттэн ыла көрөөччүбүтүн «Мин таптыыр спутнигым» диэн саҥа сэрийээли көрөргүтүгэр ыҥырабыт.
Хаартыска: Марфа Пермякова тиксэриитэ.