Бүгүҥҥүттэн “Оҕо сайдыытын инвестициялааһын – кэлэр кэм тирэҕэ” диэн бастакы кэмпириэнсийэ ыытыллар
Бүгүҥҥүттэн “Оҕо сайдыытын инвестициялааһын – кэлэр кэм тирэҕэ” диэн бастакы научнай-практическай онлайн кэмпириэнсийэ саҕаланна. Тэрээһини СӨ Үүнэр көлүөнэтин пуондата иилээн-саҕалаан ыытар.
Кэмпириэнсийэҕэ оскуола иннинээҕи үөрэхтээһин, социальнай өҥө көдьүүһүн сыаналааһын, өҥөнү тиэрдии, ону тэҥэ оҕону кыра эрдэҕиттэн уонна оскуолаҕа киириэн инниттэн үөрэтии боппуруостара көрүллүөхтэрэ.
Тэрээһиҥҥэ педагогтары, преподавателлэри, оскуола иннинээҕи үөрэхтээһин тэрилтэлэрин үлэһиттэрин, төрөппүттэри сэргэ учуонайдар, доруобуйа харыстабылыгар уонна социальнай сайдыыга сыһыаннаах уопсастыбаннай тэрилтэлэр салайааччылара, исписэлиистэрэ кыттыахтара. Арассыыйа киин куораттарыттан уонна Москваттан биллэр экспиэртэр кэлиэхтэрэ.
“Биллэрин курдук, оҕо инникитин ситиһиилээх буола үүнэн тахсар, интеллектуальнай уонна айар дьоҕура сайдар сүрүн тирэҕэ кыра сааһыгар ууруллар. Үс сааһыгар диэри мэйиитэ, ньиэрбэ киин систиэмэтэ олохсуйар, бу кини сайдарыгар саамай табыгастаах сааһа. Ону тэҥэ, оҕо сайдыытыгар хаалыылааҕын, доруобуйатыгар хааччахтааҕын кыратыгар булан ситиһиилээхтик туоратыахха, эрдэттэн сэрэтиэххэ сөбө билиминэн уонна быраактыканан дакаастанан турар. Тустаах кэмпириэнсийэҕэ болҕомто – оҕону чопчу кыра сааһыттан сайыннарыыга ууруллар. Итиэннэ оннооҕор экэнэмиическэй өттүнэн ылан көрдөххө, кыра оҕо сайдыытыгар угуллубут үп көдьүүстээҕин араас чинчийиилэр дакаастыыллар. Онон Үүнэр көлүөнэ пуондата бу хайысхаҕа үлэтэ, чугастааҕы сылларга ыытар инники күөҥҥэ турар үлэлэриттэн биирдэстэринэн буолар”, — диэн пуонда генеральнай дириэктэрэ Владимир Егоров этэр.
Бэлиэтээн аастахха, Саха сирэ Арассыыйаҕа оскуола иннинээҕи үөрэхтээһиҥҥэ уонна инновационнай эрэгийиэннэр икки ардыларыгар инники кэккэҕэ сылдьар. Саха сирэ былырыын норуоттар икки ардыларынааҕы кэмпириэнсийэҕэ оскуола иннинээҕи үөрэхтээһин эйгэтигэр фокус-эрэгийиэнинэн буолбута. Онтон оҕо кыратыттан дьоҕурдааҕын, талааннааҕын буларга уонна сайыннарарга туһаайыллыбыт “Айдарыылаах оҕолор” бырайыак АСИ көрүүтүнэн Арассыыйаҕа оскуола иннинээҕи бастыҥ быраактыканан ааттаммыта. Билигин бу бырайыагы өрөспүүбүлүкэҕэ киэҥник тарҕаталлар.
СӨ Үүнэр көлүөнэҕэ пуондатын пресс-сулууспата.