Саха сиригэр VIII төгүлүн ыытыллар “Наука 0+” бэстибээл бүгүҥҥүттэн үлэтин саҕалаата. Тэрээһин хамсык дьаҥынан сибээстээн, быйыл онлайн барар. Бу улуустар кытталларыгар өссө улахан кыаҕы биэрэр диэн тэрийээччилэр бэлиэтииллэр.
Бэстибээл аһыллыыта М.К.Аммосов аатынан Хотугулуу-Илиҥҥи федеральнай университет “Точка кипения” саалатыгар буолла. ХИФУ ректора, Бүтүн Арассыыйатааҕы “Наука 0+” VIII бэстибээл эрэгийиэннээҕи операторын салайааччыта Анатолий Николаев: “Бэстибээл саҥа көрүҥүнэн ыытыллыыта, кылгас кэм иһигэр 300-тэн тахса лиэксийэни, “төгүрүк остуолу”, биктэриинэни, о.д.а. тэрийэргэ кыах биэрэр. Хас биирдии лиэксийэ бэйэтэ туспа уратылаах, интэриэһинэй”, — диэн эттэ. Итиэннэ онлайн эрэсииминэн ыытыллыыта өрөспүүбүлүкэ бары олохтоохторугар туһалаах буолуон ыйда.
СӨ Үөрэҕин уонна наукатын миниистирин солбуйааччы Михаил Присяжнай “Наука 0+” тэрээһин хара маҥнайгыттан нэһилиэнньэ бары араҥатыгар туһаайыллыбытын санатта. “Бэйэҕитигэр сөптөөх тэрээһиҥҥэ бириэмэ булан кыттыҥ, көрүҥ. Тэрийээччилэр эһиэхэ анаан чахчы интэриэһинэй бырагыраамалары толкуйдаатылар. Хас биирдии учуутал, эбии үөрэхтээһин педагогтара бүгүн-сарсын уруок, дьарык кэмигэр аҕыйах мүнүүтэни анаан “Наука 0+” бэстибээли үөрэнээччилэргитигэр киирэн көрдөрүҥ” – диэн ыҥырда.
СӨ Үөрэҕин уонна наукатын министиэристибэтин иһинэн үлэлиир уопсастыбаннай сэбиэт бэрэссэдээтэлэ Михаил Черосов быйыл бэстибээлгэ аан бастакытын улуустар кыттар буоллулар диэн иһитиннэрдэ итиэннэ бу эһиилги тэрээһиҥҥэ өссө улахан кыаҕы биэриэҕэ диэн ыйда.
Бүгүн ХИФУ Арктикатааҕы инновационнай киинин быыстапката турда. Ол курдук, уҥуоҕу, иммуниеты бөҕөргөтөр биологическай активнай эбиликтэри (БАД) итиэннэ удьуорунан бэриллэр ыарыылары диагностыыр биочибы көрдөрдүлэр.
Онтон хирургия билимин куруһуогар дьарыктанар ХИФУ мэдиссиинэҕэ институтун устудьуоннара миэстэтигэр күтэргэ эпэрээссийэ оҥорон көрдөрдүлэр. Маныаха күтэри эрдэттэн бэлэмнээбиттэр.
“Наука 0+” бэстибээл тэрээһиннэрэ барыта онлайн Skillometer искусственнай интеллегы туһанан профориентация скилл-плтаформа сыһыарыытыгар уонна Ютуб ханаалы, Zoom плтаформаны туһанан ХИФУ саайтыгар бараллар. Онон ким баҕалаах барыта киирэн көрөр кыахтаах.
Людмила ПОПОВА, “Саха сирэ” хаһыат, edersaas.ru
Хаартыска: Нина СЛЕПЦОВА (ХИФУ) уонна ааптар