Доруобуйа Уопсастыба Үөрэх уонна наука

Бүгүҥҥүттэн 1 кылааска сайабылыанньаны ылан саҕалаатылар

РФ Үөрэҕириигэ министиэристибэтин  бирикээһигэр олоҕуран, бүгүҥҥүттэн маҥнайгы кылааска киирэр оҕолор төрөппүттэриттэн сайабылыанньалары ылан саҕалаатылар.

edersaas.ru

Урукку сылларга сайабылыанньаны олунньуга ылар эбит буоллахтарына, быйыл болдьоҕо арыый хойутаата итиэннэ уһаата. Ол курдук, олорор сирдэринэн уонна чэпчэтиигэ хапсар (льготнай), бииргэ төрөөбүт убайдара-эдьиийдэрэ үөрэнэр оскуолаларыгар биэрээччилэртэн бэс ыйын 30 күнүгэр диэри сайабылыанньаны ылаллар. Салгыы үөрэх тэрилтэлэрэ үс үлэ күнүн иһинэн оҕолору оскуолаҕа ылалларын туһунан бирикээс таһаарыахтаахтар. Чэпчэтиинэн кимнээх туһаналларын Үөрэх управлениетын саайтыгар  http://www.yaguo.ru/node/788 ыйыллыбыт сигэнэн кирэн көрүҥ.

Оттон атын сиргэ баар оскуолаҕа киириэхтэрин баҕарар буоллахтарына сайабылыанньаларын от ыйын 6 күнүттэн эрэ ыытыахтарын сөп.

Дьокуускай куораттааҕы Үөрэх управлениетын начаалынньыга Алексей Семенов:

Уһуйааннарга уонна мэдиссиинэ тэрилтэлэригэр ыыппыт туоһулаһыыбытыттан аттаран, кэлэр 2021-2022 үөрэх дьылыгар 180 кылааска 5217 оҕону ылар былааннаахпыт. Итинтэн барыллаан 52 сахалыы, 128 нуучалыы кылаас диэн суоттанан олоробут. Биллэн турар, бу, төрөппүттэр оҕолорун ханнык кылааска үөрэттэриэхтэрин баҕаралларыттан тутулуктаах. Уопсайа, 49 оскуолаҕа сайабалыанньаны ылабыт. Ону таһынан, 17-с оскуола кылааһа аҕыйаҕынан сибээстээн, Оҕо айымньытын дыбарыаһыгар өссө икки кылааһы аһыахтаахпыт, — диэн иһитиннэрдэ.

Үөрэх өҥөтүн порталыттан көрдөххө, сорох оскуолаларга, гимназияларга 1 кылааска аһыллар кылаас миэстэтинээҕэр элбэх сайабылыанньалары биэрбиттэр. Ол курдук, 203-с түөлбэҕэ быйыл саҥа үлэҕэ киириэхтээх “Центр глобального образования” гимназияҕа 2021-2022 үөрэх дьылыгар 72 миэстэҕэ номнуо 225 сайабылыанньа, “Айыы Кыһата” гимназияҕа 170 миэстэҕэ 176 сайабылыанньа, 17-с нүөмэрдээх оскуолаҕа 136 миэстэҕэ 201 сайабылыанньа киирбит.

Хас оскуола аайы тиэхиньиическэй исписэлиистэр үлэлииллэр. Киирбит сайабылыанньалары барытын көрө, бэрэбиэркэлии олороллор. Дьокуускай куорат уокуруктааҕы дьаһалтатын дьаһала тахсыбыта. Сайабылыанньаларын ханна бэлиэтэммит (регистрация) сирдэринэн сыһыарыллыбыт оскуолаҕа биэриэхтээхтэр. Чэпчэтиинэн (льгота) туһанааччылартан ураты, территорияларыттан атын оскуолаҕа биэрбиттэр сайабылыанньаларыгар акккаас тиийэр. Онон эрдэтинэ олорор сирдэринэн (регистрация) сайабылынньа биэрбиттэрэ ордук”, — диэн Үөрэх управлениетын начаалынньыга быһаарда.

Санатан эттэххэ, Дьокуускай куорат олохтоохторо  сайабылыанньаларын үөрэх порталын нөҥүө https://edu.e-yakutia.ru/ эбэтэр быһаччы оскуолаҕа тиийэн биэриэхтэрин сөп. Сиһилии 34-35-17 эбэтэр 42-31-12, 42-30-07 нүөмэринэн билсиҥ.

 

Людмила ПОПОВА, “Саха сирэ” хаһыат, edersaas.ru

Хаартыска: Мария ВАСИЛЬЕВА (СИА) https://ysia.ru

0
0