Кулун тутар 23 күнүгэр Арассыыйа бэрэсидьиэнэ Владимир Путин “Ковид-19” инфекцияны утары быһыыны ыларын туһунан бэҕэһээ мунньах кэмигэр иһитиннэрдэ.
Бэрэсидьиэн пресс-сэкиритээрэ Дмитрий Песков иһитиннэрбитинэн, Путин быһыыны ылыыта “дьоҥҥо көстөр тэрээһин” буолбатах. Кини этэринэн, бэрэсидьиэн Арассыыйаҕа оҥоһуллубут үс вакцинаттан биирин ылыахтаах. Ханнык быһыыны ыларын чопчулаабата.
“Бу вакциналар эрэллээхтэр, доруобуйаҕа куттала суохтар. Атын ханнык да омук вакциналара бу курдук үрдүк көмүскэллээх буолбатахтар”, — диэн Путин эттэ.
Кини эбэн эппитинэн, “Ковид-19” ыарыыттан утары быһыыны ылыы киһи баҕа өттүнэн буолар. Ону тэҥэ, кэлэктиибинэн иммунитеты үөскэтии ыарыыны бохсорго, хааччахтаныы эрэсиимиттэн тахсарга көмөлөһүө диэн бэлиэтээтэ.
Ангелина Васильева, “Саха сирэ” хаһыат, edersaas.ru
Хаартыска: gazeta.ru