Бүгүн, муус устар 21 күнүгэр, 18:00 чааска дойду бэрэсидьиэнэ Владимир Путин Федеральнай мунньахха Анал этиитин иһитиннэриэҕэ.
Бэрэсидьиэн Анал этиитин «Манеж» быыстапкалыыр киин саалаттан этиэҕэ. Манна дьокутааттар, сенатордар, бырабыыталыстыба чилиэттэрэ, эрэгийиэннэр быһалыктара мустуохтара.
Владимир Путин пресс-сэкирэтээрэ Дмитрий Песков иһитиннэрбитинэн, бүтэһик күннэргэ бэрэсидьиэн бырабыыталыстыба бэрэссэдээтэлин, вице-премьердэри, миниистирдэри кытта көрсөн кэпсэтэн сүбэлэспит.
Бэҕэһээ бэрэсидьиэн дьаһалтата уонна миниистирдэр кабинеттарын салалтата видео сибээһинэн улахан мунньаҕы ыыттылар. Манна социальнай эйгэ уонна инфраструктура сайдыытын туһунан кэпсэтии барда. Бэрэсидьиэн бэлиэтииринэн, үлэ түмүктээх, экэниэмикэ сайдыылаах буолуохтаах, өйөбүлгэ наадыйар дьоҥҥо көмө көрүллүөхтээх. Маныаха хас биирдии солкуобай туһалаахтык аттарыаллыахтаах диэн Владимир Путин эбэн эттэ.
Оттон социальнай чинчийиилэри ыытар эспиэрдэр институттара Арассыыйа олохтоохторо Анал этииттэн тугу күүтэллэрин сураспыт. Үлэ түмүгэ көрдөрбүтүнэн, коронавирус дьаҥа иккис былааҥҥа турар, дьон ордук үлэ миэстэтин хаалларыыга, дохуоту элбэтиигэ долгуйар эбит.