Балаҕан ыйын 13 күнүгэр тараах уонна кыптыый маастардара – баттах кырыйааччылар идэлээх бырааһынньыктарын бэлиэтииллэр.
Сорох чахчыларынан, билигин Арассыыйаҕа 70-ча тыһыынча баттах кырыйар уонна кэрэ буолуу солуоннара үлэлииллэр, ахсааннара сыл аайы эбиллэ турар.
edersaas.ru
Онтон биһиги бүгүҥҥү дьоруойбут Валентина Ивановна Куприянова Хатас сэлиэнньэтигэр олорор уонна баттах кырыйааччынан үлэлиир.
Кини сэлиэнньэ хабайар хаба ортотугар баар парикмахерскайыгар дьон эрдэттэн суруйтаран, тохтоло суох кэлэ турар.
Валентина Куприянова Дьокуускайдааҕы 8 нүөмэрдээх ГПТУ-га баттах кырыйааччы идэтин ылыаҕыттан ыла идэтинэн үлэлээбитэ хайыы үйэ 30-тан тахса сыл буолла. Үөрэҕин бүтэрэн, Майаҕа икки сыл үлэлээн баран, ыал буолан төрөөбүт Хатаһыгар көһөн кэлбитэ. Дьокуускай куоракка “Сказка” диэн оҕо парикмахерскайыгар, онтон Хатастааҕы олох-дьаһах кэмбинээтигэр үлэлээн эрдэҕинэ, дьалхааннаах 90-сыллар саҕаламмыттарыгар кэмбинээт сабыллан хаалбыта. Онон, үлэтэ суох хаалан, сопхуоска уонча сыл үлэлээбитэ. Бу кэмҥэ сопхуос үлэһиттэрин эрэ оҕолорун оҕо саадыгар ылар буоланнар, дьиэҕэ-уокка улаханнык мэһэйдэппэккэ үлэлээн, оҕуруоту үүннэрии сэкириэтин билбитэ. Баҕар, ол да үөрүйэҕэ таайан буолуо, билигин нэһилиэгэр элбэх үүнээйилээҕинэн уонна хаһаайыстыбалааҕынан биллэр саха маанылаах ыала буолан олороллор.
“… Саас, сайын бааһынаҕа, кыһын оҕуруот аһын харайар сиргэ үлэлиирбит. Онно кыптыыйбын туппутунан сылдьарым. Ким баҕалаах баттахтарын кырыйарым, химическэй эрийии өҥөтүн эмиэ онорорум. Аны 2004 сыллаахха сопхуоспут эстэн, Хатаска син өр кэмҥэ хаһаайыстыбаннай маҕаһыын иһигэр кыракый хоско, онтон баанньыкка баттах кырыйааччынан үлэлии сылдьыбытым.
Арай биирдэ, улахан эдьиийим Марианна Егоровна: “Эн предприниматель буолан үлэлээ, Хатаска парикмахерскайда ас”, — диэн сүбэлээбитэ. Кини сүбэтин ылынаммын уонна үлэлээбит уопуттаах курдук сананаммын, 2009 сылтан ИП арыммытым. Хос арендалаан, коммуникациятын оҥорторон, итии-тымныы уулаан, парикмахерскайга наадалаах тэриллэри барытын атыылаһан, күн бүгүнҥҥэ диэри тигинэччи үлэлии турабын.
Сүрүн үлэм быыһыгар куоракка килийиэннэрбэр тиийэн эмиэ баттах кырыйабын, бэйэлэрин баҕаларынан бүрүчүөскэлэрин оҥоробун. Үлэбин олус сөбүлүүр буоламмын, дьон көрдөстөҕүнэ хаһан да аккаастаабаппын. Үлэ бэтэрээнэ буолбутум. Аны өссө уонча сыл үлэлээбит киһи диэн баҕалаахпын. Килийиэннэрбин кытары кэпсэтэрбин, сүбэ-ама биэрэрбин, кинилэртэн да туһалаах билиини-көрүүнү ыларбын сөбүлүүбүн.
Оскуолатааҕы саастарыттан баттахтарын кырыйтаран улааппыт уолаттарым-кыргыттарым хайыы үйэ бэйэлэрэ үлэһит дьон, ыал бэрдэ буоллулар. Көрүстэхтэхтэринэ дорооболоһоллор. “Эн парикмахерскайгар үлэлии сылдьаҕын дуо?” — диэн сөхпүттүү ыйыталаһаллар. Истиэххэ наһаа үчүгэй. Ол аата мин кинилэр-өйдөрүгэр санааларыгар хаалан хаалбыт буоллахпына, үчүгэй маастар эбиппин диэн испэр үөрэ саныыбын”, — диэн Валентина Куприянова кэпсиир.
Бастыҥ маастартан сүбэ:
Кырааскаламмыт, сырдатыллыбыт, мелирование оҥоһуллубут баттаҕы эбэһээт “кырааскаламмыт эбэтэр сырдатыллыбыт баттахха” диэн аналлаах шампунунан суунуҥ уонна эмиэ оннук ааттаах бальзамы туттуҥ. Бальзамы баттах уһунугар эрэ сотоҕут, төбө тириитигэр соппоккут. Ыйга иккитэ мааската оҥостуҥ. Маасканы бэйэҕит оҥостуоххутун сөп эбэтэр маҕаһыынтан ылан, суругун-бичигин ааҕан эрэ баран туттуҥ.
Надежда ЕГОРОВА, «Саха сирэ», edersaas.ru