Бүгүн — «Суһал көмө» сулууспатын күнэ

Бөлөххө киир:

Арассыыйаҕа «Суһал көмө» үлэһиттэрин күнэ дьоһуннаахтык бэлиэтэммэт этэ. Арай, аҕыйах сылтан ыла идэлээх бырааһынньык быһыытынан бэлиэтиир буоллулар.
«Суһал көмө» үлэһиттэрэ төһө түргэннэриттэн, сөптөөх дьайыыларыттан дойдуга мөлүйүөнүнэн киһи доруобуйата тутулуктаах. Кинилэр ким эрэ олоҕун быыһаары күннэри-түүннэри сүүрэллэр.

«Суһал көмө» диэн мэдиссиинэ биир тутаах салаата тэриллиитин устуоруйатыгар эргиллэн  ылар буоллахха, ыарыһахха суһал көмөнү ыҥырыы ыарахаттардаах этэ. Тоҕо диэтэххэ, төлөпүөн сибээһэ суоҕа, полиция учаастагар тиийиэххэ диэри эмиэ ырааҕа. Ол иһин, «суһал көмө» тэриллэр бастакы сылларыгар быраастарга ыҥырыыны полиция үлэһиттэрэ уонна дуоһунастаах  дьон тириэрдэр кыахтаахтара. Сүрүннээн  ыксаллаах түгэннэргэ уонна эчэйиилэргэ эрэ ыҥыраллара. Кимиэхэ эрэ сөтөл киирдэҕинэ эбэтэр температурата таҕыстаҕына, бырааһы дьиэҕэ ыҥырар кыаллыбата. Суһал көмө үлэлиир дьиэтэ да диэн суох буолара, онон ыарыһаҕы уулуссаҕа көрөллөрө, ол кэнниттэн эмп-том анаан баран дьиэтигэр ыытыллара эбэтэр полиция стационаргар ылаллара.
Сотору кэминэн эмчиттэр уонна бэрээдэги көрөөччүлэр бииргэ үлэлиир уопуттарын атын куораттар батыспыттара. ХХ үйэ саҥатыгар «суһал көмө» ыстаансыйаларын ахсаана биллэ элбээбитэ, мэдиссиинискэй идэҕэ үөрэммит исписэлиистэр бу салааҕа үлэлии кэлэр буолбуттара. Бу идэ престиһэ үрдээн уонна билиниини ылан,  улахан куораттарга научнай-чинчийэр институттар тэриллибиттэрэ. Олор ортолоругар күн бүгүҥҥэ диэри киэҥник биллэр Москваҕа Склифосовскай аатынан уонна Санкт-Петербурга Джанелидзе аатынан научнай-чинчийэр институттар.
Өрөбөлүүссүйэ кэннинээҕи сылларга эмискэ ыалдьыбыт дьону тутар суукканы быһа үлэлиир пууннар баар буолбуттара. Быраастар ыарыһах дьиэтигэр кэлэллэрэ, мэдиссинискэй биригээдэлэр кэлээскилээх матасыыкылларынан сылдьан ыарыһахха наадалаах көмөнү барытын оҥороллоро.
Аҕа дойду Улуу сэриитин сылларыгар чуолаан «суһал көмө» быраастара сэрии толоонугар аан бастакынан көмөҕө кэлэллэрэ…
Аныгы Арассыыйаҕа өр кэмҥэ маннык бырааһынньык баара улаханнык биллибэт-көстүбэт да курдуга. Ол гынан баран, Ковид-19 ыарыы баар буолуоҕуттан «суһал көмө» суолтата уонна наадата өссө үрдээтэ. «Суһал көмө» үлэһиттэрэ ыарыы өрө турбут кэмигэр саамай уустук үлэни толорон кэллилэр -– кинилэр куруук атахтарыгар тура сылдьаллар, ыарыһахтары кытары бастакынан кинилэр хантаактаһаллар. Бу исписэлиистэр тугунан да кэмнэммэт кылааттарын РФ бэрэсидьиэнэ улаханнык сыаналаан, 2020 сыллаахха муус устар 28 күнүгэр Суһал көмө үлэһитин күнүн биллэрбитэ. «Суһал көмө» үлэһиттэрин аймахтара уонна доҕотторо, биир идэлээхтэрэ уонна тустаах салайааччылар эҕэрдэлииллэр. Дьуһуруустубаҕа сылдьар быраастар эҕэрдэлэри өссө махталлаах ыарыһахтарыттан туталлар.
Өрөспүүбүлүкэбит киин куоратыгар «Суһал көмө» ыстаансыйатыгар 500-тэн тахса киһи 4 симиэнэнэн 12 чаас үлэлиир, тимир көлө массыыналар сарсыарда 8 чаастан симиэнэлэригэр сүүрбүтүнэн бараллар . Пандемия кэмигэр күҥҥэ 600-чэ ыҥырыыга тиийэр кэмнэрдээх этилэр.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0