Бүгүн, бэс ыйын 8 күнүгэр, Арассыыйаҕа Социальнай үлэһит күнүн бэлиэтиибит. Бу күн 2000 сыл алтынньытыгар РФ бэрэсидьиэнэ Владимир Путин ыйааҕа тахсыаҕыттан бэлиэтэнэр.
Быйылгы эпидемиологическай балаһыанньанан сибээстээн, бэлиэ күҥҥэ анаммыт тэрээһиннэр онлайн эрэсииминэн ыытыллыахтара.
Былаан быһыытынан, видеоконференц-сибээс нөҥүө өрөспүүбүлүкэтээҕи социальнай сулууспалар үлэһиттэрин үөрүүлээх быһыыга-майгыга эҕэрдэлиэхтэрэ. Бастыҥ үлэһиттэр судаарыстыбаннай наҕараадалары тутуохтара.
Маны сэргэ Өрөспүүбүлүкэтээҕи социальнай көрүү-истии комплекснай киинэ онлайн эрэсиимҥэ арыллыаҕа.
Бу күннэргэ социальнай ситимнэргэ өрөспүүбүлүкэ салалтата, араас сылларга үлэлээбит миниистирдэр, биэдэмистибэлэр кэлэктииптэрэ эҕэрдэлиэхтэрэ.
«Тоҕо мин социальнай үлэһит идэтин таллым?», «Саха сирин социальнай сулууспатын устуоруйатыттан» диэн аахсыйалар киэҥ хабааннаахтык ыытылла тураллар.
СӨ Үлэҕэ уонна социальнай сайдыыга
министиэристибэтин пресс-киинэ.