Бүгүн өрөспүүбүлүкэ олоҕун-дьаһаҕын, бэлиитикэтин, экэниэмикэтин, үлэһит дьонун сырдатар СИА-ҕа биир бэлиэ дьоро күн ааста.
1991 сыллаахха САССР Үрдүкү Сэбиэтин уонна Миниистирдэр сэбиэттэрин быһаарыыларынан Уһук Илиҥҥэ бастакынан СИА (ЯСИА) тэриллибитэ. Быйыл атырдьах ыйын 31 күнүгэр Саха иһитиннэрэр агентствотын төрүттэммитэ 31 сылын туолла. СИА төрүттэниитигэр өрөспүүбүлүкэбит бастакы бэрэсидьиэнэ Михаил Николаев, оччотооҕу премьер-миниистир Вячеслав Штыров, бэчээт миниистирэ Валерий Качаев төһүү буолбуттара. Хамсыктан сылтаан 30 сыллаах өрөгөйдөөх үбүлүөйүн хойутаан бүгүн бэлиэтээтэ. Онон өрөспүүбүлүкэтээҕи пресс-кииҥҥэ бүгүн аан дойду, дойдубут, өрөспүүбүлүкэбит сонуннарын тутатына, кырдьыгынан, сэргэхтик кэпсии-ипсии, иһитиннэрэ олорор агентство бэтэрээннэрэ, урукку салайааччылара, билиҥҥи үлэһиттэрэ муһуннулар.
СИА кылаабынай эрэдээктэрэ Андрей Никифоров бу сонуннары иһитиннэрэр агентство аныгы олоҕу кытта тэҥҥэ хардыылаан, бэйэтин ааҕааччыларын ахсаанын элбэтэрин, аудиториятын кэҥэтэрин, саҥа инструменнары баһылыырын туһунан иһитиннэрдэ. Чуолаан, аҕа көлүөнэ үлэһиттэр эдэрдэргэ өрүү сүбэ-ама буолалларын бэлиэтээтэ.
СӨ Инновацияҕа, сыыппара сайдыытыгар миниистирин солбуйааччы Георгий Андреев СИА өрөспүүбүлүкэ тутаах маассабай иһитиннэрэр сириэстибэтинэн буоларын бэлиэтээн туран, СИА суһаллык, мобильнайдык, аныгылыы тылынан этэрин курдук, креативнайдык үлэлиирин тоһоҕолоон эттэ уонна истиҥ эҕэрдэтин тириэртэ.
“Полиметалл” хампаанньа дириэктэрин солбуйааччы Петр Васильев урукку өттүгэр агентствоны салайбыт буолан, маннык көлүөнэлэр ситимнэрэ быстыбакка салҕанан барарыгар баҕа санаатын эттэ уонна сыаналаах бэлэҕин туттарда. СӨ Бырабыыталыстыбатыгар информационнай бэлиитикэҕэ уонна маассабай коммуникацияларга департаменын салайааччыта Семен Трофимов төрөөбүт өрөспүүбүлүкэбит аатын-суолун үрдэтиигэ күүскэ үлэлииргэ ыҥырда, сайдыы саҥа суолугар үктэниэҕэ диэн эрэнэрин эттэ.
Үбүлүөйдээх күнүнэн Михаил Николаев, “АЛРОСА” хампаанньа, Саха сирин Ил Дарханын сүбэһитэ Татьяна Тарасова, Уус Алдан улууһун баһылыга Алексей Федотов эҕэрдэ суруктарын ааҕан иһитиннэрдилэр. СИА-тан сайдан-үүнэн тахсыбыт, билигин “Сахабэчээт” генеральнай дириэктэрэ Ньургуяна Стручкова үлэлииригэр күүс-көмө, сүбэ буолбут, түүн хойукка диэри үлэлиир биир идэлээхтэрин туһунан истиҥ тылынан аҕынна уонна сэмэй бэлэҕин туттарда. “Харысхал” пуондаттан Ольга Крюкова пуонда бары тэрээһиннэрин сырдатар агентствоҕа махталын биллэрдэ.
“Сахамедиа” генеральнай дириэктэрэ Виктор Колесов Арассыыйа Федерациятыгар саамай уустук кэмҥэ Уһук Илиҥҥэ бастакынан тэриллибит агентство үлэтин оччолорго тэтимнээхтик саҕалаабытын, билигин иннин диэки сайдыыга “Сахамедиа” иһигэр киирэн, өссө күүскэ үлэлиир былааннааҕын бэлиэтээтэ. СИА аата Саха сиригэр эрэ буолбакка, Уһук Илиҥҥэ бүттүүнүгэр иһиллэрин туһунан киэн тутта эттэ. Үөрүүлээх тэрээһини Леонид Анциферов, Сахаайа ырыалара киэргэттилэр. Онон сайдар-үүнэр, өрөспүүбүлүкэ олоҕун-дьаһаҕын, бэлиитикэтин, экэниэмикэтин, үлэһит дьонун сырдатар СИА-ҕа биир бэлиэ дьоро күн ааста.
Бэлэмнээтэ Женни Стрюкова
Хаартыска: СИА-тан.