Бүгүн, Саха Өрөспүүбүлүкэтин Судаарыстыбаннаһын күнүгэр, Сэбиэскэй Сойуус Дьоруойа Владимир Лонгинов ытык аатын үйэтитэр искибиэр арылынна.
Бэлиэ түгэнинэн мустубут дьону-сэргэни СӨ Ил Дархан уонна Бырабыыталыстыба дьаһалтатын салайар Афанасий Владимиров, Уус Алдан улууһун баһылыга Алексей Федотов, Горнай улууһун баһылыга Никита Андреев, Дьокуускай куорат баһылыгын бастакы солбуйааччы Евгений Григорьев, Сайсары уокуругун бэтэрээннэрин Сэбиэтин бэрэссэдээтэлэ Николай Егоров эҕэрдэлээтилэр.
Афанасий Владимиров Аҕа дойдуну көмүскүүр уоттаах сэриигэ Саха сирин дьоно хорсун быһыыларын бэлиэтээтэ. Сэбиэскэй Сойуус Дьоруойдарын ортолоругар Владимир Лонгинов аата баарынан киэн туттарын эттэ.
«Владимир Лонгинов 22 сааһыгар фроҥҥа ыҥырыллыбыта. Баара-суоҕа 24 сааһыгар сир үрдүгэр эйэлээх олох иһин сырдык тыынын толук уурбута. Кини пулеметчик буолан, куруук хабараан хапсыһыы инники кирбиитигэр сылдьыбыт. Биһиги Дьоруойбутунан киэн туттабыт, кини ытык аатыгар сүгүрүйэбит», — диэтэ Афанасий Семёнович.
Маны сэргэ, кини Владимир Лонгинов дьылҕата Уус Алданы, Горнайы сэргэ, Үөһээ Бүлүүнү уонна Томпону кытары ыкса сибээстээхтэрин бэлиэтээтэ. «Бу искибиэргэ биһиги ытык Дьоруойбут сырдык аатыгар өрүү сүгүрүйэр буолуохпут. Биһиги үрдүбүтүгэр мэлдьи эйэлээх халлаан баар буолуохтун», — диэтэ.
Горнай улууһун баһылыга Никита Андреев уонна Уус Алдан улууһун баһылыга Алексей Федотов СӨ Бырабыыталыстыбатыгар, үрдүкү салалтаҕа, Дьокуускай куорат дьаһалтатыгар, искибиэр тутуллуутугар көмөлөспүт, өйөбүл буолбут дьоҥҥо махтаннылар.
«2019 сыллаахха, былырыын, биһиги Сэбиэскэй Сойуус Дьоруойа Владимир Лонгинов төрөөбүтэ 100 сылын бэлиэтээбиппит. Онно Дьокуускай куоракка Лонгинов аатынан уулусса өрөмүөннэммитэ. Быйыл Улуу Кыайыы 75 сылынан ытык киһибит аатынан искибиэр арылынна. Бу улахан үөрүү Судаарыстыбаннас күнүн кытары тэҥҥэ алтыспыта суолтаны өссө улаатыннарар, — диэтэ Никита Андреев уонна Горнай улууһун олохтоохторун ааттарыттан искибиэр тутуллуутугар өйөбүл буолбут, субуотунньукка кыттыбыт бар дьоҥҥо махтанна.
Долгутуулаах тэрээһин кыттыылаахтара, искибиэри көрө-истэ кэлбит дьон Сэбиэскэй Сойуус Дьоруойа В.Д.Лонгинов пааматынньыгар тыыннаах сибэкки дьөрбөтүн уурдулар.
СӨ Ил Дархан уонна Бырабыыталыстыба пресс-сулууспата
Мария Васильева (СИА) хаартыскаҕа түһэриилэрэ