Бүгүн – өрөгөйдөөх күн!

Ааптар: 
Бөлөххө киир:

Сэтинньи 14 күнүгэр “Алампа 2019” бириэмийэ туттарылларын туһунан ааҕааччыларбытыгар ый анараа өттүгэр билиһиннэрбиппит. Саха сирин устуоруйатыгар киирэр тэрээһин бүгүн киэһэ, алта чаастан буолар.

edersaas.ru

Тоҕус номинация

Эрдэттэн барыл быһыытынан биллэриллибит тоҕус номинация бүтэһиктээхтик бигэргэтиллибит.

“Бастыҥ худуоһунньук” – манна сыана киэргэтээччилэр, декорация оҥорооччулар киирсэллэр.

“Бастыҥ суруйааччы” – тылбаасчыттар, тыйаатыр кириитиктэрин номинациялара.

“Бастыҥ мэссэнээт” – тыйаатырга көмөлөһөр, артыыстары өйүүр дьону ытыктаан бэлиэтиир номинация.

“Идэтигэр бэриниилээх” – бэйэтин үлэтигэр туйгуннары бэлиэтиир.

“Бастыҥ  муусука айааччы”,

“Киинэ эйгэтигэр үлэтин иһин” номинациялар бааллар.

“Бастыҥ  режиссер”, “Бастыҥ  драматург” уонна “Бастыҥ  артыыс” номинацияларга тыйаатыр үлэһиттэрэ бэлиэтэниэхтэрэ. Бастыҥ  артыыс аатын дьахтар оруолун уонна эр киһи оруолун толорооччуларга тус-туһунан туттарыахтара.

Алампа тула түмсүү

Бу бириэмийэ сүрүн уратыта – Саха сирин айар түмсүүлэрин барыларын холбуур тэрээһин буолар.  Суруйааччылар, худуоһунньуктар, киинэ, тыйаатыр, хаһыат, мусуой үлэһиттэрэ бииргэ түмсэн, уһулуччу ситиһиилээх коллегаларын чиэстиир уопсай бириэмийэ.  Анемподист Иванович-Алампа саха омукка айар идэлэр үгүстэригэр сыһыаннаах киһи. Онон бу бириэмийэ тэрээһинигэр кыттыбыт тэрилтэлэр, сойуустар үгүстэрэ соһуппат.

Ол курдук тэрээһиҥҥэ кыттыыны ыллылар:

— Бириэмийэни толкуйдаабыт идейнэй көҕүлээччилэр: Олоҥхо тыйаатырын толорор дириэктэрэ Мария Турантаева, наука дуоктара, Алампа айар үлэтин үөрэтээччи Валентина Григорьевна Семенова,  уопсастыбаннай диэйэтэл Михаил Александрович Протодьяконов.

— Тэрийиигэ кыттааччылар:  «Саха сирэ» хаһыат эрэдээктэрэ Родион Кривогорницын,  Олоҥхо тыйаатырын сүрүн бибилэтиэкэрэ Лена Тимофеева, Тыйаатырдар сойуустарын бэрэссэдээтэлэ Айаал Аммосов, Саха сирин үтүөлээх артыыһа Иннокентий Луковцев, Ресурснай-бырайыактыыр киин сүрүн үлэһитэ Григорий Петров, Суруйааччылар сойуустарын чилиэнэ, бэйиэт Елизавета Мигалкина, Олоҥхо тыйаатырын сүрүн үлэһитэ Мария Григорьева,  Ойуунускай аатынан литературнай мусуой дириэктэрин солбуйааччы Линда Иванова,  Эдэр композитордар сойуустарын бэрэссэдээтэлэ Николай Михеев.

Спонсор быһыытынан үгүс тэрилтэ көмөлөстө. Олор истэригэр «Звук и Свет» хампаанньа,  Дьохсоҕон нэһилиэгэ, Таатта улууһун дьаһалтата, Саха сиринээҕи ресурснай-бырайыактыыр киин, Саха сиринээҕи тыйаатыр үлэһиттэрин сойууһа,  Саха сирин худуоһунньуктарын сойууһа,  Саха сирин суруйааччыларын сойууһа, «Саха сирэ» хаһыат, Саха тыйаатыра, Олоҥхо тыйаатыра, Опера уонна балет тыйаатыра, Үҥкүү тыйаатыра, Эстрада тыйаатыра уонна да атын тэрилтэлэр. Улахан көмөнү Павел Ксенофонтов-Ойуур Байбал, Таатта улууһун биир дойдулаахтарын түмсүүтэ оҥордулар.

Өрөгөйдөөх күн

Тэрээһин сценарийын биллилээх бэйиэт, суруйааччы Яна Байгожаева суруйбут. Өрөгөйдөөх күн хаамыытын Саха тыйаатырын сүрүн режиссера Руслан Тараховскай туруорар.

Эрдэ этиллибитин курдук, бириэмийэ анал статуэткалаах уонна түөскэ иилинэр туллук бэлиэлээх буолар. Бу балары дойдуга киэҥник биллэр үлэлэрдээх, айар куттаах Николай Чоччасов оҥордо.

Ыҥырыы суругу, былакааты эдэр худуоһунньук Роман Марков айан, ойуулаан оҥордо.

Бириэмийэ туттарыытын бэйэлэрин муусукаларынан дьиҥ сахалыы тыастаах “Кыл Саха” ансаамбыл доҕуһуоллуоҕа. Ону таһынан, Саха сирин норуодунай артыыһа Лидия Павловна Новгородова үөрэнээччилэрэ арфаҕа оонньоон бу күнү киэргэтиэхтэрэ.

Егор Карпов. edersaas.ru

+1
0
+1
0
+1
0
+1
0
+1
0
+1
0
+1
0