Отут үс сыл устата «Хатас» сопхуоска дириэктэрдээбит, Россия уонна Саха Өрөспүүбүлүкэтин норуотун хаһаайыстыбатын үтүөлээх үлэһитэ, Ленин, «Үлэ Кыһыл Знамята», «Бочуот знага», «Полярная звезда» уордьаннар кавалердара, Дьокуускай куорат уонна Мэҥэ Хаҥалас улууһун Бочуоттаах олохтооҕо Парасковья Павловна Федорованы билбэт, кини аатын истибэтэх киһи сахаҕа суоҕа чахчы.
Парасковья Павловна салайар сылларыгар сопхуос үс салаанан (сүөһүнү, сибиинньэни иитиигэ, сиртэн үүнээйини ылыыга) идэтийэн үлэлээбитэ. Сылтан сыл үрдүк көрдөрүүлэри ситиһэрэ, өрөспүүбүлүкэҕэ биир бастакынан сүөһүнү уонна сибиинньэни иитэр толору хааччыллыылаах комплекстары үлэҕэ киллэрбитэ. Хортуоппуйу 340 гектарга, аһаҕас буорга үүнэр оҕуруот аһын 120 гектарга олордоро. 1990 с. аҥаардас ыанар ынаҕын ахсаана 1,5 тыһ тиийбитэ, ынах ахсыттан 3 тыһ. 475 киилэ үүт ыанара. Хаһаайыстыба оҥорон таһаарар бородууксуйатынан 149 тыһ. киһи нэһилиэнньэлээх Дьокуускай куораты хортуоппуйунан 26,4 %, оҕуруот аһынан 19,3 %, үүтүнэн 6,7 % хааччыйан олорбута. Бастыҥ ыанньыксыттар, оҕуруотчуттар, сибиинньэ көрөөччүлэр мэхэньисээтэрдэр уонна үлэни-хамнаһы иилиир-саҕалыыр исписэлиистэр таһаарыылаах үлэлэрэ мэтээллэринэн, уордьаннарынан бэлиэтэнэрэ.
Сопхуос кыаҕыран истэҕин ахсын Хатас кэҥээн сайдан испитэ, пиэрмэ үлэһиттэригэр анаан элбэх кыбартыыралаах үс таас дьиэ, элбэх кыбартыыралаах биэс арболит дьиэ тутуллан үлэҕэ киллэриллибиттэрэ. Элбэх ыал сопхуос көмөтүнэн уһаайбалаах чааһынай дьиэлэри туттубуттара, гаас киллэриллибитэ. Таас оскуола, балыыһа баар буолбуттара, суол аспаалламмыта. Ити курдук, Парасковья Павловна өр сыллаах сыралаах үлэтин түмүгүнэн, кини кыһамньытынан Хатас дэриэбинэтэ куораттыы тииптээх аныгы бөһүөлэккэ кубулуйбута. Оттон олохтоох нэһилиэнньэ уонна сопхуос оробуочайдара үлэни өрө тутар, үлэһит киһини өйүүр, кыһалҕалаахха көмөлөһөр, үөскүүр проблемалары уталыппакка быһаарар баһылыктаах буоланнар, үлэ тула түмсүбүттэрэ, элбэҕи ситиспиттэрэ.
Парасковья Павловна бочуоттаах сынньалаҥҥа тахсан да баран, уопсастыбаннай олохтон туора турбат. Бэтэрээннэр сэбиэттэрин, Тыа сирин үлэһит дьахталларын сэбиэтин салайсар, эдэр биир идэлээхтэригэр көмө-тирэх буола олорор, сиэннэрин, хос сиэннэрин биэбэйдэһэр. Үлэҕэ, төрөөбүт дойдуга бэриниилээх буолуу холобурун тус бэйэтинэн көрдөрөр Ытык кырдьаҕас сүһүөҕүн үрдүгэр сылдьан бүгүн 90 сааһын томточчу туолла!
Раиса СИБИРЯКОВА, “Саха сирэ” хаһыат, edersaas.ru