Сыл аайы муус устар 2 күнүгэр, Дания улуу остуоруйаһыта Ганс Христиан төрөөбүт күнүгэр, аан дойду барыта Оҕо кинигэтин аан дойдутааҕы күнүн бэлиэтиир.
edersaas.ru
1967 сылтан бэлиэтэнэр бу күҥҥэ тэрийээччилэр кыра эрдэхтэн үчүгэй кинигэлэри ааҕар наадатын, киһи духуобунай уонна өй-санаа өттүнэн сайдарыгар оҕо кинигэтэ улахан оруоллааҕын тоһоҕолоон бэлиэтииллэр.
Саха сиринээҕи «Айар» Национальнай кинигэ кыһата оҕолору литератураҕа, кинигэ ускуустубатыгар уонна култууратыгар, ийэ тылга сыһыарарга, кини кыра эрдэҕиттэн ааҕыы эйгэтигэр сыстарыгар үгүс өрүттээх үлэни ыытар. Ол эбэтэр оҕоҕо аналлаах, араас дьэрэкээн кинигэлэри таһаарыынан эрэ буолбакка, оҕоҕо кинигэ сылаас эйгэтин бэлэхтиир.
Ол курдук, бүгүн күнүс 3 чаастан, Оҕо кинигэтин аан дойдутааҕы күнүгэр «Айар» национальнай кинигэ кыһата уонна «Үрдэл» актыыбынай сынньалаҥ паарката оҕолору уонна кинилэр төрөппүттэрин көхтөөх сынньалаҥҥа ыҥырар.
Бүгүн манна дьаарбаҥка-быыстапкаҕа оҕолорго аналлаах кинигэ арааһа атыыланыаҕа.
Аһаҕас халлаан анныгар кутаа аттыгар бырааһынньык ыалдьыттарын -– суруйааччылары уонна оҕо кинигэлэрин ааптардарын Айталина Романованы, Галина Ивановна Иванованы-Айтыына Ураны, Валерий Егорович Михайловы-Алып Чаҕааны кытары көрсүөхтэрэ.
Тоотук, Паук Киһи, Хара пантера уонна Тимир киһи курдук дьоруойдары кытары квест-оонньуулар буолуохтара. «Үөрүү-көтүү оптуобуһа» үҥкүү кэлэктиибэ ыалдьыттары эҕэрдэлиэҕэ.
Тэрийээччилэри кытары көхтөөхтүк кыттан, кинигэ эйгэтигэр киириҥ, өрөбүллэргитин туһалаахтык атаарыҥ.
Надежда ЕГОРОВА, «Саха сирэ» хаһыат, edersaas.ru