Бүгүн Ньургун Скрябин “Тахти Кубога” норуоттар икки ардыларынааҕы турнир финалыгар тустуоҕа

Саха тустууга оскуолатын иитиллээччитэ Ньургун Скрябин “Тахти Кубога” норуоттар икки ардыларынааҕы турнирга 61 киилэҕэ диэри ыйааһыҥҥа тахсыылаахтык тустан, бүгүн кыайыылааҕы быһаарар түмүк хапсыһыыга көбүөр хаһаайына Мохаммед Рамезанпуру кытта күөн көрсүөҕэ.

Иран Тебриз куоратыгар буола турар көҥүл тустууга Тахти Кубогар XXXVIII норуоттар икки ардыларынааҕы турнирга сүүрбэттэн тахса дойдуттан 90-ча бөҕөс кыттар.

61 киилэҕэ диэри ыйааһыҥҥа Белоруссия былааҕынан кыттар Мэҥэ ыччата Ньургун Скрябин тахсыылаахтык тустан, бүгүн кыайыылааҕы быһаарар түмүк хапсыһыыга көбүөр хаһаайына Мохаммед Рамезанпуру кытта күөн көрсүөҕэ.

Бэҕэһээ саха тустууга оскуолатын иитиллээччитэ эр-биир Азербайджан тустууктарын Эльчин Валиевы (10:0) уонна эдэрдэргэ аан дойду чөмпүйэнээтин призера Павриз Ибрагимовы (10:7) хотуталаата. Онтон бэрт тыҥааһыннаах хапсыһыыга иранецтар эрэллэрин Мохаммед Маликины 5:3 ахсаанынан баһыйа тутан, олохтоохтору хомотто. Салгыы Азия чөмпүйүөнүн, Олимпийскай оонньуулар кыттыылаахтарын Томар Сандипы кыайда (10:1).

Бүгүн киэһэ Саха сирин бириэмэтинэн киэһэ 22.30 чаастан түмүк хапсыһыылар саҕаланыахтара.

Арассыыйа тустууктара Тахти Кубогар кыттыбаттар. Билигин дойду сүүмэрдэммит хамаандата Сочига эрчиллэр-бэлэмнэнэр түмсүүгэ сылдьар.

Роман ПОПОВ, “Саха сирэ” хаһыат, edersaas.ru