Красноярскайга буола турар Иван Ярыгин кэриэһигэр көҥүл тустууга ХХХ норуоттар икки ардыларынааҕы турнирга бэҕэһээ эр дьоҥҥо 57, 61 уонна 70 киилэҕэ диэри ыйааһыннарга хапсыһыылар буоллулар. Олор түмүктэринэн кимнээх бүгүн кыһыл көмүс мэтээл иһин киирсиэхтэрэ билиннэ.
Ыччаттар ортолоругар аан дойду чөмпүйүөнэ Абасгаджи Магомедов (Дагестан) 57 киилэлээхтэргэ чаҕылхай тустуутунан биир дойдулаахтарын үөртэ. Ол курдук, бастаан Турция уопуттаах бөҕөһүн Ахмет Пекеры 13:3 ахсаанынан баһыйда, онтон 2017 сыллааҕы аан дойду чөмпүйэнээтин үрүҥ көмүс призерун американец Томас Гилманы ыраастык уурда. Финал аҥарыгар аан дойду үс төгүллээх призеругар монгол Эрденебат Бехбайаарга 1:5 ахсаанынан хотторон иһэн, хапсыһыы бүтүө аҕыйах сөкүүндэ хаалбытыгар утарылаһааччытын партерга түһэрээт тута “накаттаан” кыайыылааҕынан таҕыста. Бүгүн финалга Муслим Садулаевы (Чечня) кытта күөн көрсүөҕэ.
70 киилэҕэ диэри ыйааһыҥҥа аан дойду икки төгүллээх чөмпүйүөнэ Магомедрасул Газимагомедов (Дагестан) утуу-субуу американец Джейсон Чемберлены (12:0), салгыы тыҥааһыннаах киирсиигэ Алания бөҕөһүн Давид Баевы (2:2), онтон Разамбек Жамаловы (0:6) кыайталаан финалга таҕыста. Быһаарыылаах хапсыһыыга кинини утары аан дойду призера монгол Мандахнаран Ганзориг тахсыаҕа.
Саха тустууну сэҥээрээччилэрин болҕомтото 61 киилэҕэ диэри ыйааһыҥҥа финалга тахсар иһин хапсыһыыга туһаайылынна. Манна Эдуард Григорьевпыт (Арассыыйа) былырыыҥҥыттан Румыния былааҕынан тустар Николай Охлопковпытын кытта күөн көрүстэ. Күрэстэһии Николай Охлопков туһатыгар түмүктэннэ – 12:5. Онон бүгүн кыайыылааҕы быһаарар түмүк хапсыһыыга Николай 23-гэр диэри саастаахтарга аан дойду чөмпүйүөнэ Магомедрасул Идрисовы (Дагестан) кытта тустуоҕа. Оттон Эдуард боруонса мэтээл иһин киирсиэҕэ.
Иван Ярыгин кэриэһигэр көҥүл тустууга ХХХ норуоттар икки ардыларынааҕы турнир.
Тохсунньу 24 күнэ, Красноярскай.
Түмүк хапсыһыылар
57 кг. Муслим Садулаев (Арассыыйа) — Абасгаджи Магомедов (Арассыыйа)
61 кг. Магомедрасул Идрисов (Арассыыйа) — Николай Охлопков (Румыния)
70 кг. Мандахнаран Ганзориг (Монголия) — Магомедрасул Газимагомедов (Арассыыйа)
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна