Сыл аайы ыам ыйын 12 күнүгэр Мэдиссиинискэй сиэстэрэ аан дойдутааҕы күнэ бэлиэтэнэр.
Мэдиссиинискэй сиэстэрэлэр – алын сүһүөх мэдиссиинискэй үөрэхтээх уонна ыарыһаҕы көрөргө-истэргэ быраас уонна биэлсэр ыйыытын толорор исписэлиистэр. Кинилэр – быраастар сүрүн көмөлөһөөччүлэрэ, эмтэнээччини кытары быһаччы үлэлиир дьон.
Мэдиссиинискэй сиэстэрэлэр билигин доруобуйа харыстабылын үлэһиттэрин ортолоругар саамай элбэх ахсааннаахтар. Тоҕо диэтэххэ, быраас быраактыкатыгар мэдиссиинискэй өҥөнү сиэстэрэлэр оҥороллор.
Коронавируһу утары охсуһарга мэдиссиинискэй сиэстэрэлэр бэйэлэрин уопуттарын уонна идэлэригэр таһымнарын, саамай бастыҥ хаачыстыбаларын уонна быһаарыныылаах дьайыылаахтарын көрдөрдүлэр.
х х х
Мэдиссиинискэй сиэстэрэлэр күннэрэ аһымал сиэстэрэлэр уопсастыбаннай тэрилтэлэригэр – мэдиссиинискэй сиэстэрэлэр аан дойдутааҕы сэбиэттэригэр (International Council of Nurses, ICN) холбоһуохтарыттан ыла бэлиэтэнэр. Билигин ICN аан дойдутааҕы федерациятыгар мэдиссиинискэй сиэстэрэлэр 130-тан тахса национальнай ассоциациялара, о.э. 27 мөлүйүөнтэн тахса мэдиссиинискэй сиэстэрэ киирэр.
Бу бырааһынньык Арассыыйаҕа 1993 сылтан бэлиэтэнэр. Үгэс курдук, ыам ыйын 12 күнүгэр мэдиссиинискэй тэрилтэлэргэ ыытыллар араас дьаһаллар (кэмпэриэнсийэлэр, сэминээрдэр, “төгүрүк остуоллар” уо.д.а.) чөл олоҕу сырдатыыга, сиэстэрэ идэтин таһымын үрдэтиигэ уо.д.а. ананаллар.
х х х
2000 сылтан Саха сиригэр мэдиссиинискэй үлэһиттэр ассоциалара тэриллэн ситиһиилээхтик үлэлиир. Кинилэр 2002 сыллаахха Арассыыйа мэдиссиинискэй сиэстэрэлэрин ассоциацияларын састаабыгар киирбиттэрэ. Ассоциация чилиэннэрэ атын эрэгийиэннэр уопуттарын билсэллэр, сиэстэрэ дьыалатыгар билиилэрин уонна уопуттарын хаҥаталлар.
Ассоцияция сүрүн соругунан мэдиссиинискэй сиэстэрэ идэтигэр уопсастыба болҕомтотун тардыы, кинилэр интэриэстэрин көмүскээһин буолар. Ассоциация чилиэннэрэ, сүрүн үлэлэрин сэргэ, былаас уорганнарын үлэтигэр актыыбынайдык кыттан, баар кыһалҕалары быһаарсаллар, доруобуйа харыстабылыгар инники былааннары торумнаһаллар.
х х х
СӨ доруобуйа харыстабылын миниистирэ Лена Афанасьева бүгүн мэдиссиинискэй сиэстэрэлэри идэлээх күннэринэн эҕэрдэлээтэ.
“Мэдиссиинискэй көмө оҥоһулларыгар эһиги оруолгутун сыаналыыр ыарахан. Мэдиссиинискэй сиэстэрэ идэтэ дириҥ билиини уонна үөрүйэҕи эрэйэр эрэ буолбатах, эһиги билигэн уонна кыһамньылаах илиигититтэн, кыһамньыгытыттан уонна үтүө санааҕытыттан эмтэнээччи туруга уонна кини үтүөрэр болдьоҕо тутулуктаах.
Бу кэрэ-бэлиэ күн хас биирдиигитигэр ытыктабылбын уонна махталбын биллэриэхпин баҕарабын.
Эһиги күн аайы оҥорор улахан уонна тыҥааһыннаах үлэҕитигэр, аһыныгас санааҕытыгар, тулуургутугар, коронавирус инфекциятын утары охсуһуу усулуобуйатыгар бэйэни харыстаммат хорсун быһыыгыт иһин махтанабын. Икки сыл устата, ардыгар бэйэҕит доруобуйаҕытыгар уонна олоххутугар суоһуур кутталы аахсыбакка, эбээһинэскитин эҥкилэ суох толордугут”, — диэн мэдиссиинискэй сиэстэрэлэргэ доруобуйаны, үлэлэригэр ситиһиини уонна тус олохторугар нус-хас буолууну баҕарда.
Надежда ЕГОРОВА, «Саха сирэ», edersaas.ru