Бүгүн ойууһут, тимир ууһа, уһуйааччы, айанньыт, бөлүһүөк Борис Неустроев-Мандар Уус 72 сааһын бэлиэтиир төрөөбүт күнэ.
edersaas.ru
“Мандары саҥатын истэ, суруйбутун ааҕа олорон, киһи ис-иһиттэн иэйэн, сырдаан кэлэр. Мин кинини түҥ былыргы үйэлэртэн аныгы олоххо баар буолан хаалбыт саха киһитин курдук ылынабын. Өйө-санаата, тыла-өһө, айылҕаны кытта алтыһыыта, барыга барытыгар, дьоҥҥо-сэргэҕэ сыһыана барыта ити этиллибит санааны бигэргэтэр”, – диэн философскай наука доктора, профессор Андрей Саввинов “Барҕа санаам, сүбэ тылым” диэн Мандар Уус кинигэтин аан тылыгар суруйуутун кытта, бука, үксүбүт кэриэтэ сөбүлэһэрэ буолуо.
Мин быйыл сайын Баайаҕаҕа командировкаҕа баран кэлбитим. Борис Федорович Моҕол ураһа тигиитин хаамыытын бэйэтэ көрдөрө сылдьан кэпсээбитэ. «50 сыллаах үлэм түмүгэ хайдах оҥоһуллан эрэрин бэйэм дьиэбиттэн хааман тиийэн көрөрүм-истэрим, тута-хаба сылдьан сүбэлиирим наһаа да үчүгэй”, – диэн Мандар Уус санаатын үллэстибитэ.
Кырдьык да, кини бииргэ алтыһар дьонун кытта санаатын үллэстэ, сүбэлэһэ сылдьарыттан ис-иһиттэн үөрэрэ. Оттон дьиэтигэр Мандары тапталлаах кэргэнэ Федора Борисовна сып-сылаас хойуу үүттээх чэйинэн көрсөрүттэн ордук дьол баар үһүө! Мандар Уус кэргэнин диэки сылааһынан көрө-көрө, сиэннэрэ кэлэн барбыттарын кэпсээбитэ. Кырачааннарын көрүдьүөс түгэннэрин саныы-саныы эһээлээх эбээ күлэ-үөрэ олороллоруттан киһи тэҥҥэ дьоллонор курдуга.
Таптыыр кэргэнин, убаастыыр-саныыр биир дойдулаахтарын өйөбүллэринэн Борис Федорович күн бүгүн үөрэ-көтө айа-тута сылдьар, үйэлээх баҕа санаатын олоххо киллэрэр.
Төрөөбүт күҥҥүнэн, Мандар Уус!
Елена ПОТОЦКАЯ, «Саха сирэ» хаһыат, edersaas.ru
Хаартскаҕа ааптар түһэриитэ.