Уопсастыба Успуорт

Бүгүн киэһэ саха үс бөҕөһө финалга тахсар иһин тустуоҕа

Дмитрий Коркин кэриэһигэр норуоттар икки ардыларынааҕы турнир бастакы күнүгэр 57, 65, 74, 86, 97 кг диэри ыйааһыннарга, көһүтүллүбүтүн курдук, сытыы хапсыһыылар буоллулар.

Саха тустууга оскуолатын иитиллээччилэрэ Арыйаан Тютрин (57 кг), Виктор Рассадин (65 кг) итиэннэ Герман Устинов (74 кг) күүстээх утарылаһааччыларын баһыйа тутаттаан, финал аҥарыгар тахсары ситистилэр.

Ол курдук, Арыйаан бастаан Леван Метревели (Испания) — 9:4, салгыы былырыыҥҥы турнир финалиһын Тамир Гармаевы (Бурятия) — 10:0, Владимир Егоровы (Македония) — 5:0 ахсаанынан кыайталаата. Финал аҥарыгар кини Рикуто Арайы (Япония) кытта күөн көрсүөҕэ.

Оттон Виктор Рассадин Азербайджан ааттааҕын Али Разимзадены (6:2), АХШ бөҕөһүн Хендерсоны (9:8), Бурятияттан Алексей Боровицкайы (3:2) кытта сытыы хапсыһыыларга кыайыылаах тахсыталаата. Мантан киэһэ кини Саятбек Окасовы (Казахстан) кытта финалга тахсар иһин тустуоҕа.

Герман Устинов бастакы хапсыһыытыгар аан дойду призерун, Азия чөмпүйүөнүн монгол М. Ганзоригы 9:3 ахсаанынан баһыйа тутта. Онтон Тыва маастарын Эртене Мортуй-оолу (10:0), Бурятия биллэр бөҕөһүн Арсалан Будажаповы (7:6) кыайталаата. Финалга тахсар иһин киирсиигэ кинини утары дойду икки төгүллээх боруонса призера  Никита Сучков тахсыаҕа.

Финал аҥарынааҕы хапсыһыылар бүгүн «Триумф» Спорт киинигэр киэһэ 18.00 чаастан саҕаланыахтара.

Финал аҥарыгар тустуохтара:

57 кг.  Димчик Ринчинов (Беларусь) — Парвиз Ибрагимов (Азербайджан), Рикуто Арай (Япония) — Арыйаан Тютрин (Саха сирэ); 65 кг.  Виктор Рассадин (Саха сирэ) — Саятбек Окасов (Казахстан), Тимур Очир-Тулга (Монголия) — Баяр Цыренов (Бурятия); 74 кг.  Франк Чамизо (Италия) — Исраил Касумов (Красноярскай), Никита Сучков (Красноярскай) — Герман Устинов. 86 кг Александр Зеленков (Красноярскай) — Арсанали Мусасалиев (Дагестан), Вили Хейко (Финляндия) —А.Базригалех (Иран); 97 кг — Игорь Овсянников (Красноярскай) — Нурмагомед Гаджиев (Азербайджан), Эрик Джиоев (Красноярскай) — Б.Улзийсайхан (Монголия).

Роман Попов, edersaas.ru

1
0

Добавить комментарий