Атырдьах ыйын 27 күнүттэн балаҕан ыйын 4 күнүгэр диэри Кемерово куоракка буоксаҕа эр дьоҥҥо Арассыыйа чөмпүйэнээтэ ыытыллар. Дойду бастыҥ боксердара быйыл Белградка буолар аан дойду чөмпүйэнээтигэр кыттар сүүмэрдэммит хамаандаҕа киирэр уонна бастыыр иһин илин-кэлин түсүһүөхтэрэ.
48 киилэҕэ диэри ыйааһыҥҥа Саха сирин биэс боксера, 51 киилэҕэ диэри ыйааһыҥҥа үс боксер күрэхтэһиэҕэ. Бастакы эргиир сэрэбиэйин билиһиннэрэрбит:
— 48 киилэҕэ диэри:
Мухаммадаюб Исамилов — Дмитрий Наимов
Михаил Прокопьев — Шамиль Колтубаев
Талбан Егоров — Константин Луговский
Борис Сидоров — Дмитрий Калмыков
Ярослав Алексеев — Аминтаза Бекишев
— 51 киилэҕэ диэри:
Евгений Мартынов — Иброхим Нафизов
Николай Григорьев — Ахтем Закиров
Василий Егоров
Атын ыйааһыннарга Саха сириттэн Игнат Сивцев, Виталий Стручков (60 киилэҕэ), Айтал Дьяконов (63,5 киилэҕэ), Александр Литовченко (67 киилэҕэ) уонна Назар Андреев (75 киилэҕэ) күрэхтэһиэхтэрэ.
Чөмпүйэнээккэ Арассыыйа 60 эрэгийиэниттэн 400 спортсмен кыттара күүтүллэр. Күрэхтэһии Буокса норуоттар икки ардыларынааҕы ассоциациятын (AIBA) саҥа быраабылатыгар олоҕуран, барыта 13 ыйааһынынан ыытыллыаҕа.
Боксердарбыт сайын СӨ Успуорка бэлэмнэнии киинин Аллараа Бэстээххэ баар баазатыгар бэлэмнэммиттэрэ, итиэннэ Краснодарга түмүктүүр хомуурга сылдьыбыттара.
Хаартыска — sportyakutia.ru