Бүгүн түүн (Москва бириэмэтинэн – 22.22 чааска) күн «өлүүтэ» (солнечное затмение) буолар. 4 мүнүүтэ устата Күн Ый күлүгэр киирэн, көстүбэт буолан ылыаҕа.
Сир шарын арҕааҥы өттүгэр сытар дойдуларга үчүгэйдик көстүөҕэ. Ол курдук, Тиихэй акыйаан соҕуруулуу-илиҥҥи өттүгэр, Чилиттэн, Аргентинаттан көрөр ордук табыгастаах. Арассыыйаттан үчүгэйдик көстүбэт.
Москва планетарийын үлэһиттэрэ этэллэринэн, бу сылга Ый иккитэ, Күн үстэ “өлөн” ылыахтаахтар. Сотору кэминэн, от ыйын 17 күнүгэр, Ый “өлөрө” күүтүллэр. Исписэлиистэр бу кэми “коридор затмения” диэн ааттыыллар.
Астролог сүбэтэ
Астрологтар этэллэринэн, бу күн киһи санаата, иэйиитэ күүһүрэр. Холобур, бу кэмҥэ кыыһырдаххына, кимниин эрэ этистэххинэ, эппит тылларыҥ икки бү күүһүрэн, бэйэҕэр кэлиэхтэрин сөп. Ол эбэтэр, этиһии өр кэмнээх өстөһүүгэ тиэрдиэн сөп. Онон куһаҕаны ыралаабакка, саҥарбакка, төттөрүтүн, дьону бырастыы гынан, эйэлэһэн, үтүөнү эрэ санаан бу күнү аһарарга кыһаллыҥ диэн астрологтар сүбэлииллэр.
Чуумпуран олорон, ис эйгэни иһиллэнии, туохха сыыспыккын, тоҕо табыллыбатаҕын ырытан-ырыҥалаан көрүү, хайдах гынан ыралары олоххо киллэрэр туһунан толкуйданыы туһалаах буолуоҕа. Ыраастаныы, арчыланыы, уруккуттан босхолонуу кэмэ. Доруобуйаҕытын көрүнэ сылдьыҥ. Улахан суолталаах дьыалалары саҕалаамаҥ.
Ангелина Васильева, “Саха сирэ” хаһыат, edersaas.ru