Уопсастыба Эдэр саас

Бүгүн – Үҥкүү Аан дойдутааҕы күнэ! АФАНАСИЙ ҮҤКҮҮЛҮҮР

Олоҕун бүтүннүү үҥкүүгэ анаабыт, Саха сиригэр, киэҥ Арассыыйаҕа, аан дойду бастыҥ сценаларыгар үҥкүүлээн, айылҕаттан бэриллибит талаанынан махталлаах көрөөччүтүгэр үтүмэн үгүс үөрүүлээх  түгэннэри бэлэхтиир Арассыыйа үтүөлээх, Саха Өрөспүүбүлүкэтин норуодунай артыыһа Афанасий Афанасьевка биһиги ааҕааччыбыт, бэйиэт Полина Находкина—Полина-Победа хоһоон анаабытын билиһиннэрэбит.

 АФАНАСИЙ ҮҤКҮҮЛҮҮР

/РФ үтүөлээх, СӨ норуодунай артыыһыгар А.Афанасьевка/

 

Афанасий үҥкүүтэ

Абылаата бар дьону,

Саха сирин таһынан

Омук сирэ сэҥээрдэ.

 

Күлэн-үөрэн бэйэтэ

Аламаҕай майгылаах,

Дьоҥҥо чугас дууһалаах —

Дьиҥнээх норуот  артыыһа.

 

Сахатынан киэн тутта

Омук сирин кэрийдэ,

Сылдьар сирин аайытын

 Саха аатын ааттатта.

 

Үҥкүүтүнэн тириэртэ

Үтүө баарын биллэрдэ,

Хамнаныыта барыта

Харахтары манньытта.

 

Үрүмэччи буолбатах—

Афанасий үҥкүүлүүр,

Кэрэ тылы тиспэккэ

Кэрэ баарын сэһэргиир.

Полина-Победа

Уус-Алдан,

24.08.2020с.

 

 

Ыспыраапка

Афанасьев Афанасий Дмитриевич

 

1963 с. Таатта улууһун Ытык Күөл с. төрөөбүтэ. Саха АССР култууратын үтүөлээх үлэһитэ Августина Клакинова салалтатынан, Тааттатааҕы “Доҕордоһуу” ансаамбылга дьарыктаммыта, үҥкүүлээбитэ. Ленинград куоракка үөрэммитэ. СӨ Национальнай үҥкүү тыйаатырыгар солиһынан 40-ча сыл айымньылаахтык үлэлээбитэ. Билигин  преподавательскай үлэнэн дьарыктанар. Ыччаттары, үөрэнээччилэри аныгы хореографияҕа уһуйар.

Айар үлэтэ: “Үҥкүүгэ сүгүрүйэбин” (1994), “Таптал күлүгэ” (1995), “Үҥкүү хоруола” (2004), “Үҥкүүгэ олох” (2008) айар биэчэрдэри тэрийбитэ. П.А.Ойуунускай аатынан Саха академическай тыйаатырыгар, А.С.Пушкин аатынан Нуучча академическай драматическай тыйаатырыгар итиэннэ Суорун Омоллоон аатынан Опера уонна балет судаарыстыбаннай тыйаатырыгар хас даҕаны дырааманан уонна муусуканан испэктээктэргэ туруорааччы-балетмейстердаабыта. 2007 сыллаахха дьон биһирэбилин ылбыт «Танцевальный бум. Мир танцует в разных направлениях» диэн тус бырайыагын олоххо киллэрбитэ. Билигин  улахан дьоҥҥо уонна оҕолорго маастар-кылаастары ыытар, “төгүрүк остуолларга” кыттар, С.А.Зверев-Кыыл Уола төрөөбүтэ 110 уонна 115 сыллаах үбүлүөйдээх ыһыахтарын, өрөспүүбүлүкэ араас бөдөҥ култуурунай тэрээһиннэрин иилээн-саҕалаан ыыппыт Саха сирин тарбахха баттанар артыыһа.

edersaas.ru

2
0

Добавить комментарий