От ыйын 27 күнүгэр сарсыардаттан Ил Дархан Айсен Николаев Хаҥалас улууһугар ойуур баһаардарын үөһэттэн көрө-истэ, балаһыанньаны миэстэтигэр тиийэн билистэ. Кини “Өлүөнэ очуостара” национальнай пааркаҕа эмиэ сырытта. Билигин манна түөрт ойуур баһаара баар.
Хаҥалас улууһугар быйыл уопсайа 29 916,5 га иэннээх сиргэ 50 ойуур баһаара, ол иһигэр 11 баһаар «Өлүөнэ очуостара» айылҕа пааркатын сиригэр турбута. Уоту утары охсуһууга 1 547 киһи уонна 43 техника күүһэ тардыллыбыта. Ил Дархан Хаҥалас улууһугар сырыытын түмүгүнэн, улууска баар ойуур баһаардара үгүстэрэ умуруоруллубуттарын туһунан иһитиннэрдэ. Билиҥҥитэ 429 киһи уонна 25 техника 25 335 га иэннээх 7 баһаары умуруорууга үлэлииллэр.
Бүгүҥҥү туругунан өрөспүүбүлүкэҕэ 135 ойуур баһаара баар. Ааспыт сууккаҕа 350 тыһ. гектардаах 34 баһаар умуруорулунна. Уоту утары охсуһууга 1800 киһи үлэлиир, ол иһигэр федеральнай саппаастан 600 үлэһит.
— Күннэтэ ойуур баһаардарын балаһыанньата арыый да буолан иһэр. Күн бүгүн биир да баһаар нэһилиэнньэлээх пууннарга кутталы үөскэппэттэр. Ол гынан баран, өрөспүүбүлүкэ арҕаа өттүгэр быһыы-майгы уустук. Сунтаар, Үөһээ Бүлүү, Бүлүү улуустарыгар элбэх баһаар баар. ЫБМ уонна Оборона министиэристибэлэрин көмөлөрүнэн, баһаардарын бохсууга көдьүүстээх үлэ ыытыллар, — диэтэ Ил Дархан.
СӨ Ил Дарханын уонна бырабыыталыстыбатын пресс-сулууспата
«