Балаҕан ыйын 27-30 күннэригэр Дьокуускайга III бигэтик сайдыы хотугу форума ыытыллар.
edersaas.ru
Быйылгы форум килиимэт уларыйыытыгар уонна элбэх сыллаах ирбэт тоҥу харыстааһыҥҥа ананан, Арктика сэбиэтин эгидатынан, «Хотугу форум» хотугу эрэгийиэннэр аан дойдутааҕы тэрилтэлэрин, Саха Өрөспүүбүлүкэтин Бырабыыталыстыбатын уонна М.К.Аммосов аатынан ХИФУ тэрийиилэринэн ыытыллар.
Тэрийээччилэр бэлиэтиилэринэн, килиимэт уларыйыыта уонна элбэх сыллаах ирбэт тоҥу харыстааһын – бэйэ-бэйэлэрин кытары ситимнэһэр улахан кыһалҕа буолар. Арктикаҕа, планета экологиятын саамай уйан систиэмэтигэр, килиимэт уларыйыытынан сибээстээн тахсар уларыйыылар Аан дойду тулалыыр эйгэтин туругар сабыдыаллара улахан. Ордук өрө сыллаах ирбэт тоҥ уларыйыыта тоҥ сиргэ үүммүт инфраструктураҕа охсор итиэннэ нэһилиэнньэ олоҕор-дьаһаҕар дьайар.
Форум былаһааккаларыгар эспиэрдэр Арктиканы уонна Хотугу сири туруктаахтык сайыннарыы сыалын, кэскилин итиэннэ туорайдыыр кыһалҕаларын тустарынан дьүүллэһиэхтэрэ. Бу дьоһун түһүлгэ дьыалабыай бырагыраамата киэҥ: панельнай уонна экспертнай дискуссиялар, тиэмэлэринэн сиэксийэлэр, «төгүрүк остуоллар», аан дойдутааҕы тэрилтэлэр дьаһаллара, бырайыактары билиһиннэрии, лиэксийэлэр, маастар-кыластар уонна быыстапкалар ыытыллыахтара. Ону таһынан Хотугу форум 30 сылыгар анаммыт тэрээһин буолуоҕа диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru