Бүгүн – Ылдьыын күнэ. Бу күн эһэлэрбит, эбэлэрбит хортуоппуйдарын амсайаллара, хостонуор диэри өссө төһө улаатыан быһаараллара.
Атырдьах ыйын 2 күнүгэр сибиэһэй хортуоппуйу амсайыы – былыргы үгэс. Билигин хортуоппуй түргэнник ситэр, улаатар саҥа суортарын таһааран, аныгы дьон Ылдьыын күн хортуоппуйу бастакытын сиэхтээхпит диэн улаханнык тутуспаттар, арыый эрдэлииллэр диэххэ сөп.
Былыргылар Ылдьыын таҥарата этиҥи, чаҕылханы, ардаҕы, үрдүк үүнүүнү кытта сибээстээх дииллэр. Онон үрдүк үүнүүнү ылар туһугар, чуолаан хортуоппуйу бу күн хостоон көрүллүөхтээҕин туһунан сорох чахчылар ыйаллар, ол эрээри, чопчу быһаарыы суох. Салгыы ардахтаан, атырдьах ыйыгар диэри өссө улаатыахтаах диэн сабаҕалыыллар.
Манна даҕатан эттэххэ, хортуоппуй Соҕуруу Эмиэрикэттэн тарҕаммыта биллэр. Перу Лема куоратыгар баазалаах норуоттар икки ардыларынааҕы хортуоппуй киинэ баарын, онно 7 тыһыынчаттан тахса хортуоппуй суордун кэллиэксийэтин хомуйбуттарын ыйаллар.
Людмила ПОПОВА, “Саха сирэ” хаһыат, edersaas.ru
Хаартыска: https://53news.ru