«Эн, Комсомол, мин дьолум!» — бу чахчы үчүгэйгэ угуйар тыллары аҕам саастаах дьоммут олус астына-дуоһуйа истэллэр. Сэбиэскэй кэм саҕана комсомоллар хамсааһыннара олус күүстээҕэ, этэргэ дылы, хайаны да түҥнэри көтөр кыахтаахтара.
Бүгүн — Комсомол төрүттэммит күнэ! Түгэнинэн туһанан, «Сахамедиа» РИИХ кэлэктиибин аатыттан аҕам саастаах дьоммутун ис сүрэхпититтэн комсомол күнүнэн уонна, саамай сүрүнэ, Саха сирин комсомола төрүттэммитэ 100 сылынан итиитик-истиҥниҥ эҕэрдэлиибит!
Санатар буоллахха, 1921 сыллаахха муус устарга саха комсомола тэриллибитэ. Бастакы сэкирэтээринэн Раиса Цугель буолбута. Кинилэр састааптарыгар Александр Кугаевскай, Михаил Слепцов, Илья Попов, Клавдия Глазкова-Петрова, Илья Попов, Лев Гоммерштадт, Лев Альперович, Давид Кушнарев бааллара. Куораттааҕы кэмитиэти Александр Кугаевскай салайбыта. Араас сылларга комсомол аата уларыйа сылдьыбыта эрээри, саамай сүрүнэ, эдэр ыччаты кытта үлэҕэ олус улахан суолтаны оҥорбута. Эһиил өрөспүүбүлүкэбит тэриллибитэ 100 сылын бэлиэтиибит. Ити сыллар тухары комсомол чулуу ыччаттара киллэрбит кылааттара олус улаханын билинэбит. Алдаҥҥа көмүһү хостооһуҥҥа улахан тэрилтэлэр баар буолалларыгар комсомоллар үлэлээбиттэрэ, аны хомсомуол көмөтүнэн улахан спортивнай тэрээһиннэр, үөрэхтээһин сайдыыта күүскэ барбыттара. Аҕа дойду Улуу сэриитигэр саха хомсомуоллара хорсуннук-хоодуоттук кыттыбыттара. Алмаас бырамыысыланнаһа сайдыытыгар, Мииринэй, Нерюнгри куораттар төрүттэниилэригэр барытыгар комсомоллар үлэлээбиттэрэ. Аны туран, БАМ-ы, АЯМ-ы тутууга эмиэ кинилэр этэ.
Саха комсомолун 100 сыллаах үбүлүөйүнэн кэккэ тэрээһиннэр быйыл ыытылыннылар. Ол курдук, кулун тутар 1 күнүттэн муус устар 1 күнүгэр диэри Дьокуускай куоракка «Арассыыйа – мин устуоруйам» диэн пааркаҕа Саха сирин комсомолун устуоруйатын көрдөрөр, кэрэһэлиир улахан быыстапка түһүлгэтэ тэриллибитэ.
Муус устар 3 күнүгэр, саха комсомола тэриллибит күнүгэр, хас биирдии улууска, ону сэргэ Дьокуускай куоракка комсомолларга аналлаах болуоссаттарга сибэкки дьөрбөтүн уурбуттара. Ону тэҥэ, үбүлүөйгэ аналлаах 2000 анал бэлиэни оҥордулар. Чааһынай тэрилтэ оҥорбут буолан, сыаната 380 солк.