Бүгүн Хасавюрка ыытыллар күрэхтэһиигэ Михаил Иванов уонна Евгений Коломиец кыттыахтара

Ааптар: 
Бөлөххө киир:

Аны аҕыйах чааһынан Дагестан Хасавюрт куоратыгар Гамид Гамидов аатынан Спорт дыбарыаһыгар XIX-XX үйэлэр аатырбыт бөҕөстөрүн кэриэһигэр көҥүл тустууга IX континеннар икки ардыларынааҕы Кубок иһин күрэхтэһии саҕаланыаҕа.

edersaas.ru

Быйылгы түһүлгэҕэ уон дойдуттан —Азербайджантан, Белоруссияттан, Польшаттан, Казахстантан, Кыргызтантан, Украинаттан, Перуттан, Румынияттан, Турцияттан, Узбекистантан   — итиэннэ Арассыыйа регионнарыттан 200-чэкэ спортсмен кыттара күүтүллэр. Көбүөр хаһаайыттара туспа хамаанданы туруоруохтара.

Бүгүн көбүөргэ 57, 65, 74, 97 киилэлээхтэр тахсыахтара, сарсын 61, 70, 86 и 125 киилэҕэ диэри ыйааһыҥҥа хапсыһыылар саҕаланыахтара.

Кыайыылаахтар уонна миэстэлэспиттэр туһааннааҕынан 150, 100 уонна 50 тыһыынча солкуобайынан биһирэниэхтэрэ.

Бу күрэхтэһиигэ саха тустууга оскуолатын икки иитиллээччитэ, дойду чөмпүйэнээттэрин призердара Михаил Иванов уонна Евгений Коломиец кытталлара күүтүллэр. Кинилэр иккиэн Москва уобалаһын былааҕынан тустуохтара.

Санатар буоллахха, континеннар икки ардыларынааҕы Кубокка Михаил Иванов 2014 сыллаахха ыйааһыныгар бэһис буолан турар. Бу саха тустууктарыгар билиҥҥитэ бастыҥ көрдөрүүнэн буолар.

Роман Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0