Бүгүн хандьыдааттар санаа атастаһыылара — «Якутия24″,»Саха» НКИХ, Тэтим араадьыйа ханаалларга

Ааптар: 
Бөлөххө киир:

Дьокуускай мээригэр регистрацияламмыт хандьыдааттар санаа атастаһыылара СИА сайтыгар эрэ буолбакка, «Якутия 24»,  «Саха» НКИХ уонна «Тэтим» араадьыйа ханаалларыгар эмиэ ыытыллыаҕа.

Дьон болҕомтотун тардар ураты тэрээһин «Сахамедиа» киин былаһааккатыгар быһа эпииргэ холбонон, кулун тутар  13 уонна 14 күннэригэр киэһэ 19:00 чаастан буолуоҕа.

Хандьыдааттар көрсүһүүлэрин маннык хайысхалаах тэрээһиннэри ыытарга үөрүйэх тириэньэр Анна Фомина уонна СИА кэрэспэндьиэнэ Николай Борисов салайан ыытыахтара.

СИА ааҕааччылара бэйэлэрин ыйытыыларын voprosmc@yandex.ru электроннай почтаҕа ыытыахтарын сөп. Бары хандьыдааттар санаа атастаһыытыгар кыттарга сөбүлэҥнэрин биэрэн, кулун тутар  7  күнүгэр икки бөлөххө хайдыһан, ааттара алпаабытынан ким ханнык күҥҥэ түбэспитин чопчулаабыттара. Ол курдук, бастакыттан төрдүскэ диэри нүөмэрдэр — бастакы бөлөх, бэһистэн ахсыска диэри — иккис бөлөх.

Бастакы бөлөххө Айал Прокопьев, Микаэл Заболотнай, Виталий Обедин уонна Илья Паймушкин киирэн, кулун тутар 13 күнүгэр 19 чаастан көрсүһүөхтэрэ.

Иккис бөлөххө Евгений Рябченко, Савва Михайлов, Владимир Федоров уонна Евгений Григорьев киирэн, кулун тутар 14 күнүгэр 19 чаастан санааларын атастаһыахтара. Тэрээһин ааҕааччылар ыйытыыларыгар хоруй, санаа атастаһыыта, бэйэ-бэйэни кытта мөккүһүү быһыытынан барыаҕа.

Бастакы түһүмэх тиэмэтэ — «Куорат сайдыыта: инфраструктура, ОДьКХ кыһалҕаларын быһаарыы».

Иккис түһүмэх кулун тутар 20 уонна 21 күннэригэр ыытыллыаҕа. Тиэмэтэ: «Сүрүн боппуруос: уһуйаан, тырааныспар уонна олорор дьиэни тутуу». Тэрээһин иннинэ хандьыдааттар ханнык бөлөххө киирэн кытталлара чопчуланыаҕа.

Елена ПОТОЦКАЯ, «Саха сирэ» хаһыат, edersaas.ru

Хаартыска — СИА.

+1
0
+1
0
+1
0
+1
0
+1
0
+1
0
+1
0